Dvitīyo'dhyāyaḥ
Technical Details
dvitīyo'dhyāyaḥ|
prathamaḥ pādaḥ|
[72] dvāviṃśatiprakārasya kṛtsnasyendriyaparvaṇaḥ|
saṃkṣepeṇābhidhāsyante dharmā ṇi(ni)rvacanādayaḥ||
cakṣurādīnyājñātavatadi(ājñātāvī)ndriyaparyantāni khalvindriyāni(ṇi) etāvānindriyagrāmo na bhūyānnālpīyān|
uktaṃ hi bhagavatā-“dvāviṃśatirindriyāni(ṇi) katamāni dvāviṃśatiḥ ? cakṣurindriyaṃ śrotrendriyaṃ [yāvadājñātāvī]ndriyam” iti|
tasyendriyarāśernirvacanānukramadhātubhūmyādiprakārabhedāḥ saṃkṣepeṇābhidhāyiṣyanta iti||
kiṃ puṇa (na)rdravyato dvāviṃśatirindriyāṇyatha nāmataḥ ? tadidamākhyāyate-
[73] nāmnā dvāviṃśatistāni dravyato daśa sapta ca|
yasmānnānyaddvayaṃ kāryā(yā)tsukhādinavakatrayam||
kāyendriyapradeśa eva hi kaścitstrīpuruṣendriyākhyaṃ labhate, viśiṣṭakliṣṭavijñānasaṃnniśrayabhūtatvāt| śraddhādīnāṃ ca navānāṃ samudāyeṣu triṣvanājñātamājñāsyāmīndriyāditrayākhyāḥ||
anye puṇaḥ(naḥ) paśyanti-
[74] nāmasallakṣaṇābhāvāttannāmnaḥ sārthakatvataḥ|
trayānāṃ(ṇāṃ) vargavṛttitve'pyarthamabhyeṣyate paraiḥ||
yatkhalu saṃvṛtisatyasya lakṣaṇaṃ tatteṣāṃ nāsti kriyāpauruṣyadvāreṇa tacchabdapravṛtteḥ, laukikāgradharmavat| sārthakatvāttannāmno'rthavattatkhalvetannāmneti||
strīpuruṣendriyasyāpi-
[75] viśiṣṭabuddhihetutvādādhipatyaviśeṣataḥ|
kāyendriyādviśiṣṭatvaṃ dvayorṇe(rne)trendriyādivat||
yathaiva hi cakṣurādīni kāyendriyaviśiṣṭāṇi(ni) viśiṣṭabuddhijanakatvādādhipatyaviśeṣācca, tadvadanayorapīti||
kaḥ punarindriyārthastadārabhyate-
[76] aiśvaryārtho vipaścidbhirindriyārtho'bhidhīyate|
keṣu puṇa(na)rartheṣu keṣāmīśitvam ? vayaṃ tāvatpaśyāmaḥ-
svārthavyaktiṣu pañcānāṃ
cakṣurādīnāṃ pañcānāṃ svārthaprakāśanakriyāyāmādhipatyaṃ samaviṣamamārgālocanādityarthaḥ|
caturṇāṃ tvarthayordvayoḥ||
jīvitamanastrīpuruṣendriyānāṃ(ṇāṃ) pratyekamarthadvaye| tatra tāvajjīvitendriyasya nikāyasabhāgasaṃbandhasandhāraṇayoḥ| manaindriyasyāpi saṃkleśavyavadānayoḥ| yathoktam-“cittasaṃkleśāt sattvāḥ saṃkliśyante cittavyavadānahetorviśuddhyante” iti| puṇa(na)rbhavasaṃbandhavaśibhāvānuvartanayorvā| punarbhavasaṃbandhe tāvadyathoktam-“gandharvasya tasmiṃ(smin) samaye dvayościttayoraṇya(nya)taratsaṃmukhībhūtaṃ bhavatyanunayasahagataṃ vā pratighasahagataṃ vā|” tathā “vijñānaṃ cedānanda mātuḥ kukṣiṃ nāvakrāmet” iti| vaśibhāvānuvartane yathoktam-“cittenāyaṃ loko nīyate” iti vistaraḥ|
strīpurūṣendriyayorapi sattvotpattivikalpanayorādhipatyam| sattvotpattau tāvat, prāyastadadhīnatvāttadutpatteḥ| sattvavikalpe'pi tadvaśāt| prāthamakalpikānāṃ ca sattvānāṃ ceṣṭā strīpuruṣasvarācārādivikalpabhedāt|
[77] svagocaropalabdhyādāvīṣi(śi)tvamapare viduḥ|
paurāṇāḥ punarācāryāḥ kathayanti-“cakṣurādīnāṃ pañcānāṃ pratyekaṃ caturṣvartheṣvādhipatyam| cakṣuḥśrotrayostāvadātmabhāvaśobhāyāmandhabadhirayorakāntarūpatvāt| ātmabhāvaparikarṣaṇe, dṛṣṭvā śrutvā ca viṣayavivarjaṇā(nā)t| cakṣuḥśrotravijñānayoḥ sasaṃprayogayorūtpattau| rūpadarśaṇa(na)śabdaśravaṇayoścāsādhāraṇakāraṇatve| ghrāṇajihvākāyānāṃ tvātmabhāvaśobhāyāṃ pūrvavat| ātmabhāvaparikarṣaṇe, taiḥ kabaḍīkārāhāraparibhogāt| anyat prāgvat|
caturṇāṃ puṇaḥ (naḥ) strīpuruṣajīvitamanaindriyāṇāṃ dvayorarthayoḥ| strīpuruṣendriyayostāvat-sattvabhedasattvavikalpayoḥ| sattvabhedaḥ strīpuruṣa iti| vikalpabhedo'pi saṃsthānavacanagamanādi prāgvat| saṃkleśavyavadānayorvā| tadviyutavikalā(lpā)nāṃ saṃvarāsaṃvarādīni na bhavanti| tadvatāṃ tu saṃvaraphalaprāptiḥ|
jīvitendriyamanaindriyayorapyarthadvaye pūrvavat||
svārthavijñāna evānya āhuḥ paṇḍitamāninaḥ||
kośakārādayaḥ punarāhuḥ-"svārthopalabdhāveva cakṣurādīnāṃ pañcānāmādhipatya[m]|“ tadetadvaibhāṣikīyameva kiñcidgṛhītam| nātra kiñcit kośakārakasya svakarṣa[svakaṃ darśa]ṇa(na)m| vaibhāṣaireva svārthopalabdhirukteti||
dārṣṭāntikasya hi sarvamapratyakṣam| pañcānāṃ vijñānakāyānāmatītaviṣayatvādyadā khalu cakṣūrūpe vidyete tadā vijñānamasat| yadā vijñānaṃ sat, cakṣūrūpe tadāsatī, vijñānakṣaṇasthityabhāve svārthopalabdhyanupapatteśca||
[78] kleśotpattau sukhādīnāṃ śraddhādīnāṃ guṇāptiṣu|
sukhādīnāmapi pañcānāmindriyāṇāṃ rāgādikleśotpattāvādhipatyam| yathoktam-“vedanāpratyayā tṛṣṇā” iti| “sukhāyāṃ vedanāyāṃ rāgo'nuśete” iti vistaraḥ| śraddhādīnāṃ puṇa(na)raṣṭānāṃ sarvaguṇotpattau prabhutvamiti|
vaibhāṣāḥ puṇa(na)rāhuḥ “saṃkleśavedanābhiḥ”| tathā hyuktam-“sukhāyāṃ vedanāyāṃ rāgo'nuśete” iti vistaraḥ|
vyavadāne śraddhādīnāṃ pañcānāṃ taiḥ kleśān viṣkambhya mārgotpādanāt| yathoktam-“śraddheṣīkāsaṃpanno baladhairyasmṛtidauvārikasaṃpannaḥ samāhitacitto vimucyate prajñāśastreṇāryaśrāvakaḥ sarvāṇi saṃyojanāni saṃchinatti” ityādi|
anājñātamājñāsyāmīndriyādīnāṃ tu trayānā(ṇā)muttarottarāṅgabhāve ṇi(ni)rvāṇe cādhipatyamiti||
kaḥ puṇa(na)reṣāmindriyāṇāmanukramaḥ ? brūmaḥ-
phalasaṃkleśasaṃbhāraviśuddhitvādanukramaḥ||
prākkarma phalaṃ tāvadaṣṭau vipākajatvāttasmāttāni pūrvamuktāni| tasmin vipāke sati saṃkleśasukhādibhiḥ| pañcabhirmārgasaṃbhāraśraddhādibhiḥ| viśuddhiraṇā(nā)sravaistribhiḥ||
kasmāt punardvāviṃśatireva yathā parikīrtitānyuktāni na bhūyāṃsi nālpīyāṃsīti ? tadapadiśyate-
[79] sattvākhyā sattvavaicitrya(tryaṃ)dhṛti(tiḥ) kleśodbhavaśca yaiḥ|
mārgopāyaḥ phalaprāptisteṣāmindriyatā matā||
sattvākhyā khalu pravartate cakṣurādiṣu manaḥparyanteṣu ṣaṭsu| etaddhi maulasattvadravyam| sattvavaicitryaṃ dvābhyāṃ strīpuruṣendriyābhyām| dhṛtirjīvitendriyena(ṇa)| kleśodbhavaḥ pañcabhirvedanābhiḥ| mārgopāyaḥ śraddhādibhiḥ| phalaprāptistribhirantyaiḥ| ityetasmādeṣāmindriyatā matā||
[80] sparśāśrayodbhavādhārasaṃbhogatvāccaturdaśa|
svargāpavargahetutvāt tadanyadvendriyāṣṭakam||
tatra sparśāśrayaścakṣurādīni ṣaḍindriyāni(ṇi)| prādurbhāvaḥ strīpuruṣendriyāmyām| ādhāro jīvitendriyeṇa| saṃbhogo vedanābhiḥ pañcabhiḥ| atastāvaccaturdaśoktāṇi(ni)| svargopapattinimittāni śraddhādīni pañca| apavargakāraṇāni [trīṇyanājñātamājñāsyāmīndriyādīni ata etāvantyeva||]
yadyādhipatyārtha indriyārthaḥ kasmācchandasparśamanaskārasaṃjñācetanāmahābhaumānāṃ satyādhipatye nendriyatvam ? uktaṃ hi bhagavatā-“chandamūlakāḥ sarvadharmāḥ sparśajātīyāḥ manaskāraprabhāvāḥ|” saṃjñācetanayośca saṃkleśavyavadānayorādhipatyamuktameva kuśala[cetanāyāśca| evaṃ] kleśānāmapi saṃsārahetupravartaṇa(ne) ā[dhipatyam]| nirvāṇasya ca dharmāgryatve kasmānnendriyatvam ? tadidamucyate-
[81] chandaṃ vīryāṅgabhūtatvāt sparśo vittyanubṛṃhaṇāt|
saṃjñā prajñābhibhūtatvānnendriyaṃ munirabhyadhāt||
chando hi karttukāmatā sā ca vīryāṅgabhūtā| vīryaṃ tu sākṣāt kriyayā'bhisaṃbadhyate| tadevendriyamuktam| sparśo'pi “sparśapratyayā vedanā” iti tadutpattau parikṣīṇaśaktiḥ| saṃjñāpi prāyo'pi(prāyo) lokavyavahārapatitā| sā prajñayā paramārthaikarasayā'bhibhūteti nendriyamuktā||
[82] śraddhādīnāṃ vidāṃ caiva doṣaḥ śuddhau malodaye|
pradhānatvānmanaskāro nendriyaṃ samudāhṛtam||
yoniśo manasikāraḥ khalu śraddhādīnāṃ saṅgībhavati| ayoniśo manasikāro'pi vedanādīnāṃ rāgādisaṃprayuktānāmiti so'pi nendriyam||
[83] saṃbhāvanānukūlatvādadhimokṣo'pi nendriyam|
adhimokṣo'pi śraddhopakārīti nendriyam||
kālāntaraphalotpādasaṃdehābhyāṃ na cetanā||
cetanāyāḥ khalvapi kālāntareṇa phalamiti tasya nāsati phale śaktirāvirbhavati| lokopi tasyāḥ phalasattvāvināśaṃ dṛṣṭvā vipratipannaḥ| kaścid brūte nirhetukaṃ phalamiti kaścidīśvarakṛtaṃ kaścidadṛṣṭādihetukamiti| cetanāyāḥ phalamanabhivyaktamiti| īśitvaṃ bhagavatā jānānenāpyatastasyāstrailokyakāraṇatve'pi sati cetanā nendriyeṣu vyavasthāpitā||
kuśalamahābhaumebhyo'pi
[84] nāpramādo'pyasau vīryāt, na hrīḥ prāgalbhanigrahāt|
nopekṣā nāpi cālobho vīryaśraddhābhibhūtitaḥ||
apramādastāvadvīryasya bhāṇḍāgārikasthānīyaḥ| vīryaṃ kuśalān dharmānupājeyati satān rakṣati| hrīrapi vaiśāradyasapatnabhūtā navavadhūrivāpragalbhā| tasyāḥ kuta ādhipatyam ? upekṣāpi śraddhābhibhūtā| alobhaśva vīryavirodhīti nendriyam||
[85] na prasrabdhirvidautkaṭyādvinindyatvācca nāsravāḥ|
prasrabdhiḥ khalu vedanāyāḥ vṛttiprādhānyenābhibhūtā| sāpi nendriyam| akuśalānāmapi dharmāṇāṃ vinindyatvāttu nāsravāścaṇḍālarājavat||
viprayuktānāmapi
jātyādayo na pārārthyāt
paratantrā hi jātyādayo dharmāḥ paricārakavat teṣāṃ kutaḥ prabhutvam ?
niṣkriyatvānna nirvṛtiḥ||
nirvāṇamapi niṣkriyamasatphalaṃ satkriyāśca dharmāḥ phalavanta ādhipatyayuktā iti bhagavatā nirvāṇaṃ nendriyaṃ vyavasthāpitamiti| nātra kiñcidupasaṃkhyeyaṃ ṇā(nā)pyapaneyamiti||
lakṣaṇamidānīmindriyāṇāṃ vaktavyam| tatra cakṣurādīnāmuktam| jīvitaśraddhādīnāṃ saṃprayuktaviprayukteṣūcyamāneṣu vakṣyate| duḥkhādīnāṃ tvadhunocyate|
[86] kāyasya bādhanaṃ duḥkhaṃ daurmanasyaṃ tu cetasaḥ|
bādhana[miti vartate]||
sukhaṃ ca sumanastā ca sātaṃ śārīramānasam||
sātamiti prahlādanāparyāyaḥ|
[87ab] vaiśiṣṭyānmānasaṃ sātaṃ sukhaṃ kvacidudāhṛtam|
tṛtīye dhyāne mānasaṃ sātaṃ sukhamityudāhṛtaṃ bhagavatā pañcendriyasukhātiśayatvāt| saumanasyaṃ tu prītisvabhāvaṃ sā ca tṛtīyadhyāne nāstīti sukhaṃ ca tatroktamiti |..........
.........bhaumam tadapadiśyate-
[88] ṣaṭsu bhūmiṣu vijñeyaṃ nīrajaskādyamindriyam|
anājñātamājñāsyāmīndriyaṃ ṣaṭṣu bhūmiṣu, caturṣu dhyāneṣvanāgame(mye) dhyānāntarikāyāṃ ca|
tadanye nirmale tvakṣe draṣṭavye navabhūmike||
ājñendriyamājñātavata(ajñātāvi)indriyaṃ ca navasu bhamiṣu-āsveva ṣaṭṣu triṣu cādyāsvārūpyabhūmiṣu||
atha kāni dvāviṃśatirindriyāni(ṇi) kāni rki prahātavyāni ? dudāhriyate-
[89] daurmaṇa(na)syaṃ dvihātavyaṃ
darśanabhāvanāprahātavyam|
manovittitrayaṃ tridhā|
manaindriyaṃ sukhasaumanasyopekṣāśca darśaṇa(na)bhāvanāheyāścāheyāśca|
navābhyāsapraheyāni(ṇi)
cakṣurādīni jīvitāvasānānyaṣṭau duḥkhendriyaṃ ca|
dvidhā [pañca]
śraddhādīni bhāvanāheyānyaheyāni ca| sāsravānāsravāt|
na tu trayam||
trīṇyanāsravāṇyapraheyānyeva nirdoṃṣatvāt||
yadi tarhi śraddhādīni sāsravānāsravatvātpraheyāni cāpraheyāni ca dvidhā bhavanti, trayamevānāsravam| idaṃ tarhi sūtraṃ kathaṃ nīyate ? yaduktaṃ bhagavatā-“tasyaitāni (yasyemāni) pañcendriyāni(ṇi) sarveṇa sarvaṃ na santi tamahaṃ bāhyaṃ pṛthagjanapakṣāvasthitaṃ vadāmi” iti ?
anāsravādhikārādajñāpakametat| anāsravāṇi khalvadhikṛtyaitaduktam| yasmādāryapudgalavyavasthānaṃ kṛtvā “yasyemāni” iti bhagavānavocat| pṛthagjano vā dvividhaḥ| ābhyantaraścāsamucchinnakuśalamūlaḥ, bāhyaśca samucchinnakuśalamūlaḥ| tamadhikṛtyoktam-“bāhyaṃ pṛthagjanapakṣāvasthitaṃ vadāmi” i[ti]| “sarveṇa sarvāni(ṇi)” iti vacanādvā ‘yasya laukikānyapi na santi’ ityākūtam| bāhyamityaśākyaputrīyaṃ pṛthagjanapakṣāvasthitamityāryadharmavipakṣāvasthitam| anyathā hyevamavakṣyat-‘yasyemāni pañcendriyā(ṇi) na santi tamahaṃ pṛthagjanapakṣāvasthitaṃ vadāmi’ iti| uktaṃ hi- “santrasanti sattvā loke jātā loke vṛddhāstīkṣṇendriyā api madhyendriyā api mṛdvindriyā api” ityapravartita eva dharmacakre| punaścoktam-“yāvaccāhameṣāṃ pañcānāmindriyānāṃ(ṇāṃ) samudayaṃ cāstaṅgamaṃ cāsvādaṃ cādīnavaṃ ca niḥsaraṇaṃ ca yathābhūtaṃ nāpyajñāsiṣaṃ na tāvadahamasmātsadevakāllokāt” iti vistaraḥ| na cāyamanāsravānāṃ(ṇāṃ) dharmāṇāṃ parīkṣāprakāraḥ|
vayaṃ tvatremamāgamaṃ brūmaḥ-“trīṇīmāni śrāddhasya śrā(śra)ddhāliṅgāṇi(ni)” iti vistaraḥ| kathaṃ kṛtvā jñāpakam ? śraddhāyāṃ hyasatyāmāryāṇāṃ darśaṇa(na)kāmatā na bhavet| saddharmaśrotukāmatā ca, vigatamātsaryeṇa cetasā agāramadhyavastukāmatā [ca]| yasya ca pṛthagjanasyaitānīndriyāṇi na santi sa sarva[thā bāhyapṛthagjano] bhavati kuśaladharmopaṇi(ni)ṣaddhetuvaikalyāt| tasmātsāstravāṇīti siddham||
uktaḥ prakārabhedaḥ| lābha idānīṃ vaktavyaḥ| katīndriyāni(ṇi) kasmin dhātau vipākaḥ prathamato labhyate ? tadidamārabhyate|
[90] pūrvaṃ kramodbhavaiḥ kāme vipāko [labhya]te dvayam|
kāmadhātau kra[modbhavaiḥ -aṇḍajajarāyujasaṃsvedajaiḥ pūrvaṃ] indriyadvayaṃ labhyate| kāyendriyaṃ jīvitendriyaṃ ca| etaddhi dvayaṃ tasmin śukraśoṇitabindau prathamaṃ vipākajaṃ bhavati| kliṣṭatvāttu na manaupekṣendriye vipākaḥ|
anyaiḥ ṣaṭ sapta vā'ṣṭau vā
aupapādukaiḥ punaḥ ṣaṭ| cakṣu rādīni pañca jīvitendriyaṃ ca| [yadyavyañjanā bhavanti yathā prāthama]kalpikaḥ| sapta puṇa(na)ryadyekavyañjanā yathā devādiṣu| aṣṭau vā yadyubhayavyañjanā bhavanti yathā'pāyeṣu| evaṃ tāvat kāmadhātau|
ṣaḍ rūpe
rūpadhātau punaḥ ṣaḍindriyāṇi vi[pāka]ḥ prathamato labhyante| cakṣurādīni pañca jīvitendriyaṃ ca|
antye tu jīvitam||
[ārūpye jīvitendriyaṃ] vipāko labhyate| ukto lābhaḥ||
tyāgo vaktavyaḥ| so'yamāviṣkriyate-
[91] mriyamāṇai(rni)rodhyante trīṇyante
jīvitam, manaḥ, upekṣā ceti|
aṣṭau tu madhyame|
rūpadhātau mriyamāṇairaṣṭau nirudhyante| tāni ca trīṇi, cakṣurādīni ca pañca|
daśāṣṭau nava catvāri kāme pañca śubhāni vā||
ubhayavyañjanairdaśa nirodhyante| tāni cāṣṭau strīpuruṣendriye ca| ekavyañjanairṇa(rna)va| avyañjanairaṣṭau| sakṛnmaraṇe khalveṣa nyāyaḥ| kramena(ṇa) tu mriyamānai(ṇai)ścatvāri ṇi(ni)rodhyante kāyajīvitamanaupekṣendriyāni(ṇi)| na hyeṣāṃ pṛthaṅnirodhaḥ| epa ca vidhiḥ kliṣṭāvyākṛtacittasya maraṇe draṣṭavyaḥ| kuśale tu citte sarvatra śraddhādīni pañcādhikāni| evamārūpyeṣvaṣṭau, rūpeṣu trayodaśa| ityevaṃ vistareṇa gaṇayitavyāni||
abhidharmadīpe vibhāṣāprabhāyāṃ vṛttau dvitīyasyādhyāyasya prathamaḥ pādaḥ||
dvitīyādhyāye
dvitīyapādaḥ|
indriyaprastāve sarva indriyadharmā vicāryanta ityataḥ pṛcchati| athaiṣāṃ kuśalānāmindriyānāṃ(ṇāṃ) katareṇendriyena(ṇa) kataracchrāmanya(ṇya)phalaṃ prāpyata iti ? tadidaṃ prastūyate-
[92] ādyantalābho navabhiḥ saptāṣṭābhiśca madhyayoḥ|
yā khalveṣā catuṣphalamayī mālā tasyāḥ prathamaṃ strotaāpattiphalamantyamarhattvaṃ madhye sakṛdāgāmyanāgāmiphale| tatrādyāntayoḥ phalayorṇa(rna)vabhirindriyairlābhaḥ| strotaāpattiphalasya tāvat-śraddhādibhiḥ pañcabhirājñāsyāmīndriyājñendriyābhyāmekamanayorānantaryamārgād, dvitīyaṃ vimuktimārgādveditavyam| prathamena kleśaprāpticchedo dvitīyena visaṃyogaprāptyākarṣaṇam| manaupekṣendriyābhyāṃ ceti| arhattvasya punaḥ śraddhādibhirājñāsyāmīndriyavarjjaiḥ, manaindriyena(ṇa) sukhasaumanasyopekṣendriyānāṃ(ṇāṃ) cānyatamena|
‘saptāṣṭābhiśca madhyayoḥ |’ sakṛdāgāmyanāgāmiphalayoḥ punaḥ saptabhiraṣṭābhirṇa(rna)vabhiśceti ‘ca’śabdāt| tatra sakṛdāgāmiphalaṃ tāvadyadyānupūrviko labhate, sa ca laukikena mārgena(ṇa) tasya saptabhirlābhaḥ| pañcabhiḥ śraddhādibhiḥ, manaupekṣendribhyāṃ ca| atha lokottareṇa mārgeṇa tasyāṣṭābhiḥ, ājñendriyamaṣṭamaṃ bhavati| atha [bhūyo]vītarāgaḥ prāpnoti, tasya navabhiryaireva strotaāpattiphalasya| anāgāmiphalaṃ yadyānupūrvīkaḥ prāpnoti, sa ca laukikena mārgeṇa, tasya saptabhiryathā sakṛdāgāmiphalasya|
atha lokottareṇa, tasyāṣṭābhistathaiva| atha vītarāgaḥ prāpnoti, tasya navabhiryathā strotaāpattiphalasya| tasya tu niśrayaviśeṣāt sukhasaumanasyopekṣendriyāṇāmanyatamadbhavati| yadāpyayamānupūrviko navame vimuktimārge dhyānaṃ praviśati laukikena mārgeṇa, tadāpyaṣṭābhirindriyairaṇā(nā)gāmiphalaṃ labhate| tasya navame vimuktimārge saumanasyamaṣṭamaṃ bhavati, ānantaryamārge tūpekṣendriyameva| nityamubhābhyāṃ hi tasya prāptiḥ| atha lokottareṇa praviśati, tasya navabhirājñendriyaṃ navamaṃ bhavati||
yattarhyabhidharme paṭhyate-“arhatphalasyaikādaśabhiḥ” iti| tatkathamucyate ‘navabhistasya prāptiḥ’ iti ? naiva doṣaḥ| yasmāt-
ekādaśabhirāptistu phalasyāntya[sya] hānitaḥ||
parihāya parihāyā'yaṃ samayavimukto'rhanniśrayaviśeṣātpunarlabhate| kadācit tṛtīyaṃ dhyānaṃ niśritya| kadācid dvitīyaṃ prathamaṃ vā| kadāciccaturthamanāgamyaṃ vā| ityatastisṛṇāṃ vedanānāṃ saṃbhavādekādaśabhiruktam||
athaiṣāṃ trayānāṃ(ṇāṃ) kāmarūpārūpyadhātūnāṃ kataradhātubhūmyālambanena mārgeṇa katarasya dhātoḥ parijñānaṃ bhavatīti ? tadāvirbhāvyate|
[93 ab.] svasya dhātoḥ parijñānaṃ svavipakṣadṛśā pathā|
svavipakṣadṛśā ca mārgaṇe(mārgeṇā)nāsraveṇa parijñānaṃ bhavati| tatra svadhātudṛśā tāvad duḥkhasamudayālambanena, svavipakṣadṛśā nirodhamārgālambanena traidhātukaparijñānaṃ bhavati| sāsraveṇa tvānantaryamārgeṇa saṃgṛhītena sannikṛṣṭā'dhobhūmiviṣayeṇordhvasannikṛṣṭabhūmyālambanena ca vimuktimārgasaṃgṛhītenādhobhūmiparijñānaṃ bhavati| āna[nta]ryamārgāṇāmadhobhūmiviṣayatvādvimuktyākhyānāmūrdhvabhūmyālambanatvācca| anāsravānāṃ(ṇāṃ) tūbhayeṣāmekabhūmigocaratvāditi|
atha katibhi(bhī)rindriyaiḥ kāmadhātuparijñānaṃ katibhi(bhī) rūpārūpyadhātuparijñānamiti ? tadidaṃ pratāyate-
[94] kāmadhātuparijñānaṃ prāyaḥ saptabhiriṣyate|
samalairnirmalaistvarthairaṣṭābhirabhidhīyate||
kāmadhātostāvat-sāsravaiḥ saptabhiḥ parijñānaṃ bhavati prahāṇamityarthaḥ| pañcabhiḥ śraddhādibhiḥ manaupekṣendriyābhyāṃ ca| prāyograhaṇātsaumanasyendriyenā(ṇā)pi kasyacitsamāpattyabhiprāyasya yogino maulabhūmipraveśāt| anāsravaistvindriyairaṣṭābhiḥ| ebhireva saptabhirājñedriyeṇa ca| prāyo vacanātsaumanasyendriyena(ṇa) ca navamena||
[95] rūpadhātuparijñānamiṣṭaṃ daśabhirindriyaiḥ|
pañcabhiḥ śraddhādibhiḥ, mana indriyena(ṇa), tisṛbhirvedanābhiḥ, niśrayaviśeṣādājñendriyena(ṇa) ca||
antyadhātuparijñānamekādaśabhirucyate||
yathoktairdaśabhirājñātavadindriyena(ṇa) ca| ubhābhyāṃ tasya parijñānamekaṃ vajropamasamādhisahacaram, dvitīyaṃ kṣayajñānasahagatamiti||
idamidānīṃ vaktavyam-kaḥ katibhirindriyaiḥ samanvāgata iti ? tatra tāvadayaṃ niyamaḥ-
[96] sarvasattvāstridhātusthā upekṣāyurmaṇo(no)'nvitāḥ|
ebhistribhiḥ sarvasattvāḥ samanvāgatāḥ|
tvakstrītvavyañjanaiḥ kāme
kāmāvacarāḥ sattvāḥ kāyapuruṣastrīndriyairebhiḥ pūrvāktaśca|
rūpiṇaścakṣurādibhiḥ||
rūpiṇaḥ khalu sattvāścakṣurādibhistribhiścopekṣāyurmanobhiḥ||
[97] kāminaḥ khalu duḥkhena tadrāgī durmaṇa(na)stayā|
avītarāgaḥ kāmadhātau duḥkhadaurmaṇa(na)syābhyāṃ samanvāgataḥ|
ūrdhvajastu sukhenāryaḥ śubhāhvādharajau tathā||
ūrdhvajo rūpārūpyadhātuja āryaḥ sukhena samanvāgataḥ| anāsraveṇa śubhakṛ[tsnaparīttaśubhāpramāṇaśubhāḥ] kliṣṭākliṣṭena||
[98] pratītyā(prītyā)bhāhvādharodbhūtau
ābhāsvareṣūpapannastadadharajaśca prītyā samanvāgataḥ|
śubhaiḥ sa śubhamūlakaḥ|
śraddhādibhiḥ pañcabhiḥ kuśalairaṇu(nu)cchinnakuśalamūlaḥ sarvatra samanvāgataḥ|
śaikṣābhyāṃ mokṣamārgasthau
dvā bhyāṃ śaikṣābhyāṃ [indriyābhyāṃ darśanabhāvanāmārgasthau]||
[aśaikṣo'rhan] svamārgagaḥ||
atha niyamena kaḥ katibhirindriyaiḥ samanvāgata iti ? tadidamupadarśyate-
[99] upekṣāyurmaṇo(no)yukto'vaśyaṃ trayasamanvitaḥ|
[e]bhireva tribhiḥ| na hyeṣāmanyonyena vinā samanvāgataḥ| śeṣairaṇi(ni)yamaḥ|
tatra tāvaccakṣurādibhiḥ saptabhirārūpyopapanno na samanvāgataḥ| kāmadhātau ca yenāpratilabdhavihīnāni| sukhendriyeṇa caturthadhyānādyupapannāḥ pṛthagjanāḥ, saumanasyena tri(tṛ)tīyādyupapannāḥ pṛthagjanāḥ, sukhendriyena(ṇa) rūpārūpyopapannāḥ, daurmaṇa(na)syena kāmavītarāgaḥ, śraddhādibhirniḥśubhaḥ, anāsravaestribhiḥ pṛthagjanā na samanvāgatāḥ|
caturbhiḥ kāyasukhavān
yaḥ kāyendriyeṇa so'vaśyaṃ caturbhistaiśca tribhiḥ kāyendriyena(ṇa) ca| yo'pi sukhandriyeṇa sa caturbhiḥ-taiśca tribhirupekṣādibhiḥ sukhendriyena(ṇa) ca|
cakṣuṣmānapi pañcabhiḥ||
‘api’śabdācchotraghrāṇajihvendriyairveditavyam| yaścakṣurindriyeṇa so'vaśyaṃ pañcabhiḥ-upekṣājīvitamanorūpendriyaiścakṣuṣā ca||
[100] strīndriyādyanvito'ṣṭābhiḥ
taiśca saptabhiḥ strīṃndriyeṇa(ṇa) ca| ‘ādi’grahaṇāt puruṣendriyadaurmaṇa (na)syaśraddhādīnāṃ grahaṇaṃ veditavyam| tadvānapi pratyekamaṣṭābhiḥ-taiśca saptabhiḥ puruṣendriyena(ṇa) cāṣṭamena| ebhiśca kāyajīvitamanobhiścatasṛbhirvedanābhiḥ, daurmaṇa(na)syendriyeṇa ca| śraddhā di[bhi]staiśca pañcabhirupekṣājīvitamanobhiśca|
duḥkhī yuktastu saptabhiḥ|
yo duḥkhena sa saptabhiḥ-kāyajītimanobhiścatasṛbhirvedanendriyairdaurmaṇa(na)syaṃ hitvā, tadvītarāgasya nāstīti|
ekādaśabhirantyābhyāṃ
dvābhyāmantyābhyāṃ yukto'vaśyamekādaśabhiḥ, pratyekaṃ sukhasaumanasyopekṣājīvitamanaḥśraddhādibhirājñendriyeṇa ca| evamājñātavadindriyeṇa tena taiśceti|
sapta ṣaḍbhistadādyavān||
prathamena tvanāsraveṇa yaḥ samanvāgataḥ so'vaśyaṃ trayodaśabhirmanojīvitakāyendriyaiścatasṛbhirvedanābhiḥ śraddhādibhistena ceti||
atha sarvabahubhiḥ kiyadbhiḥ samanvāgatāḥ ? taducyate-
[101] tridvīpanarakotpannā mithyātvaniyatā api|
[bahubhiḥ] hyekānnaviṃśatyā svalpairaṣṭābhiranvitāḥ||
[102] antarābhavikapretatiryakśraddhānusāriṇa [:]|
tryadhikairdaśabhiryuktā daśabhirvā navādhikaiḥ||
svalpaistrayodaśabhī rūpabhiḥ pañcabhiḥ śraddhādibhiśca jīvitamanaupekṣābhiśca| ṇā(nā)rakasya tūcchinnaśubhabījasya cakṣurādīni pañcaikaṃ vyañjanaṃ vedanāśca pañca jīvitaṃ manaśca| tiraścāṃ nāstyucchedaḥ| ya ihocchinatti so'vaśyamavīciṃ gacchati| tena natra narake śraddhādyā na santi| pañca cakṣurādīni pañca ca vedā, ekaṃ vyañjanaṃ jīvitaṃ manaśceti trayodaśa bhavanti| syurbahubhiścāntarābhavikādyāḥ pṛthagjanāstrīṇyamalāni hitvaikānnaviṃśatibhiḥ, āryāstu śraddhānusāriṇo dve amale hitvaikaṃ ca vyañjanamityekānnaviṃśatibhireva samanvāgatāḥ||
[103] samyaktvaniyatā ye tu ye ca śraddhādhimuktikāḥ|
ta ekādaśabhiryuktā daśabhirvā navādhikaiḥ||
tatra samyaktvaniyatā āryā ityarthaḥ| te pañcabhiḥ śraddhādibhirmanojīvitābhyāṃ ca tisṛbhirvedanābhirekena cānāsravena(ṇa)| sarvaprabhūtaiḥ punarekānnaviṃśatibhirekaliṅgadvyamalavarjitaiḥ||
[104] prajñāvimuktanāmārhat kāyasākṣyubhayāhvayāḥ|
akṣaikādaśakopetā yadi vā'ṣṭādaśānvitāḥ||
sarvālpairekādaśabhiḥ śraddhādibhiḥ sukhasaumanasyopekṣājīvitamanobhirekena cānāsraveṇa| bahubhistvaṣṭāda[śa]bhiḥ, dve anāsrave daurmaṇa(na)syamekaṃ ca vyañjanaṃ hitvā||
[105] kāmadevā mṛtāḥ svalpairdaśabhiḥ saptakādhikaiḥ|
anāsravatrayaṃ hitvā daurmaṇa(na)syaṃ ca| tatratyaḥ pṛthagjano yadi vairāgyaṃ gacchati sa devarṣirbhavati| ekaṃ ca vyañjanaṃ hitvā pariśiṣṭaiḥ saptadaśabhiḥ samanvāgataḥ|
ta evaikonaviṃśatyā yuktā bahubhirindriyaiḥ||
dve anāsrave hitvaikaṃ ca vyañjanam| atrāpi hi satyāni dṛśyante||
[106] [dvirdhyāna] jāstu sarvālpairdaśabhiḥ pañcakādhikaiḥ|
prathamadvitīyadhyānopapannānāṃ pṛthagjanānāṃ duḥkhadaurmaṇa(na)sye hitvā dve ca vyañjane trīṇi cāmalāni, pañcadaśabhiḥ samanvāgamaḥ|
daśabhiḥ sacatuṣkaistu śubhakṛtsnāḥ samanvitāḥ||
śubhakṛtsneṣu pṛthagjanasya saumanasyaṃ ca hitvā caturdaśabhiḥ samanvāgamaḥ|
[107] bṛhatphalā hi atyalpaistrayodaśabhiranvitāḥ|
bṛhatphaleṣu pṛthagjanasya sukhaṃ ca hitvā duḥkhādīni pūrvoktāni trayodaśa bhavanti|
yuktāḥ ṣoḍaṣa(śa)bhistvete sarvabhūribhindriyaiḥ||
yadyāryā bhavanti teṣāṃ sukhasaumanasyābhyāmanāsravābhyāṃ samanvāgama iti ṣoḍaśa bhavanti||
[108] aṣṭābhirdaśabhiḥ saikairārūpyāḥ svalpabhūribhiḥ|
svalpairaṣṭābhiḥ| pṛthagjanasyāṣṭā [:] svalpāni bhavanti| pañca śrā(śra)ddhāddhī(dī)ni, jīvitaṃ manaupekṣā ca| bahubhirekādaśabhirāryasya samanvāgamaḥ| pañcabhiḥ śraddhādibhiḥ, dvābhyāṃ sukhasaumanasyābhyāmanāsravābhyām, jīvitamanaupekṣendriyaiścaturbhiraṇā(nā)sraveṇa caikena|
sadevakauravāḥ sattvāstrayodaśabhiranvitāḥ||
pañcabhiḥ śraddhādibhiḥ pañcabhiḥ sukhādibhiḥ, kāyamanojīvitaiśca tribhiḥ||
[109] aṣṭābhirniḥśubho yukto daśabhirvā trayādhikaiḥ|
ucchinnaśubhamūlo niḥśubhaḥ sarvālpairaṣṭābhiḥ samanvāgataḥ| sukhādibhiḥ pañcabhiḥ kāyajīvitamanobhiśca| sarvaprabhūtaistu trayodaśabhiryathoktairaṣṭābhiścakṣurādibhiścaturbhirekena ca vyañjanena|
dviliṅgāḥ paścimaiḥ svalpairviśatyāpyekayā param||
ubhayavyañjanastrayodaśabhiḥ svalpaiḥ sukhādibhiḥ kāyajīvitamanobhiḥ śraddhādibhiśca pañcabhiḥ| cakṣurādīnāmalabdhavihīnatvādaniyamaḥ| sarvabahubhistvekonaviṃśatibhistrīṇyamalānyapāsya| samāpto'yaṃ matsyakagranthasamudraḥ|
vyākhyāta indriyānāṃ(ṇāṃ) dhātugatiprabhedapradarśanāgatānāṃ vistareṇa prabhedaḥ| adhunā tu momāṃsyate| kimete saṃskṛtā dharmā yathā bhinnasvabhāvāḥ, evaṃ bhinnotpādā atha niyatasahotpādā api kecidvidyanta iti ? vidyanta ityāha|
tatra saṃkṣepeṇa pañcemā dharmajātayaḥ-rūpaṃ cittaṃ caitasikāścittaviprayuktā asaṃskṛtaṃ ca|
tatrāsaṃskṛtaṃ nodeti na ca vyeti|
rūpiṇāṃ tu dharmāṇāmayaṃ niyamaḥ-
[110] saptadravyāvinirbhāgī paramāṇurbahirgataḥ|
kāmeṣvekādhikaḥ kāye dvyadhikaścakṣurādiṣu||
sarvasūkṣmaḥ khalu rūpasaṃskāropādānasaṃcayabhedaparyantaḥ paramāṇuriti prajñāpyate| sa tu saptadravyāvinirbhāgī caturbhirbhūtaistribhiścopādāyarūpaistribhistribhirvā bhūtaiścaturbhiścopādāyarūpairavinirbhāgavartyasāvaṣṭama iti|
kośakārastvāha-“sarvasūkṣmo rūpasaṃghātaḥ paramānuḥ(ṇuḥ)” iti| tena saṃghātavyatiriktaṃ rūpamanyadvaktavyam| yadi nāsti saṃghāto'pi nāsti| ataḥ siddhaṃ ‘sarvasūkṣmaṃ rūpaparamānuḥ(ṇuḥ)’ iti||
kāyedriyasahagastvaṣṭābhiścakṣurādisahitā(to) navabhiḥ||
[111] evaṃ rūpe'pi vijñeyo hitvā gandharasadvayam|
rūpadhātau bahirgataḥ pañcadravyāvinirbhāgī gandharasau hitvā| kāyasahagatastu ṣaḍbhiścakṣurādiṣu saptabhiravinirbhāgibhiḥ| yadā punassaśabdakaḥ sa saṃdhāto jāyate, tadā sarvatra yathokteṣu śabdo'dhiko gaṇayitavyaḥ|
atra punarmahābhūtāni sarvopādāyarūpāśrayabhāvaprādhānyāccatasro dravyajātayo vivakṣyante| upādāyarūpadhātucatuṣṭayaṃ tu ghaṭādidravyaprajñaptinimittatvādāyatanagaṇanayā gaṇyata iti vivakṣitāparijñānānnāsti codyāvakāśaḥ||
arūpiṇāṃ punaḥ
cittaṃ caitasikaiḥ sārdhaṃ
avinirbhāgena (ṇa) jāyata iti varttate|
saṃskṛtaṃ tu svalakṣaṇaiḥ||
sarva hi saṃskṛtaṃ svalakṣaṇaiḥ saha jātyādibhirutpadyata iti veditavyam||
abhidharmadīpe vibhāṣāprabhāyāṃ vṛttau dvitīyasya[adhyāyasya] dvitīyaḥ pādaḥ||
dvitīyādhyāye
tṛtīyapādaḥ|
yaduktaṃ caitasikāstu sahotpadyanta iti tadabhidhīyatām| ke punaste caitasikā dharmāḥ ?
te pañcaprabhedāḥ-mahābhaumāḥ, kuśalamahābhaumāḥ, kleśamahābhaumāḥ, akuśalamahābhaumāḥ, parīttakleśamahābhaumikāśca| mahatī cittabhūmireṣāmiti ta ime mahābhaumāḥ| bhūmirgatirityarthaḥ| eva sarvatra vigrahaḥ kāryaḥ|
tatra tāvanmahābhaumā nirdiśyante|
[112] daśadharmā mahābhaumā vitsaṃjñācetanāsmṛtiḥ|
chandaḥ sparśo'dhimokṣaśca dhīḥ samādhirmanaskṛtiḥ||
ete daśadharmāḥ sarvasyāṃ cittabhūmau traidhātukyāmanāsravāyāṃ ca samagrā bhavanti|
tatra vedanā sukhādistrividho'nubhavaḥ| trividhaṃ saṃveditamiti paryāyaḥ| iṣṭāniṣṭobhayaviparītaviṣayendriyavijñānasannipātajā dharmayoniḥ kāyacittāvasthā viśeṣaḥ prahlādyupatāpī tadubhayaviparītaśca tṛṣṇāheturvedi(da)netyucyate|
nimittanāmārthaikyajñā saṃjñā vitarkayoniḥ|
cittābhisaṃskāraścetanā|
cittavyāpārarūpā smṛtiḥ| cittasyārthābhilapanā kṛtakartavyakriyamāna(ṇa)karmāntāvipramoṣalakṣaṇāḥ(ṇā)|
ccha(cha)ndaḥ kartukāmatā vīryāṅgabhūtaḥ|
viṣayendriyavijñānasannipātajā cittasya viṣayaspṛṣṭiḥ, caitasikadharmo jīvanalakṣaṇaḥ sparśaḥ|
cittasya viṣaye'dhimuktiravi(dhi)mokṣo rucidvitīyanāmā cittasya viṣayāpratisaṃkocalakṣaṇaḥ|
dhīḥ prajñā dharmasaṃgrahādyupalakṣaṇasvabhāvā|
cittasyaikāgratā samādhiścittasthitilakṣaṇaḥ|
cittasyābhogo manaskāraḥ pūrvānubhūtādisamanvāhārasvarūpaḥ|
sūkṣmaḥ khalu cittacaittānāṃ viśeṣo duravadhāro rūpinī(ṇī)nāmeva tāvadoṣadhīnāṃ bahurasānāmindriyagrāhyo'pi rasaviśeṣo duravadhāraḥ, kimaṅga punaramūrtāṇāṃ(nāṃ) cittacaitasikānāṃ dharmāṇāmekakalāpavartināṃ buddhigamyaḥ ? sa tu hetuphalasvabhāvairmatimadbhirabhyūhya iti||
kuśalamahābhaume bhavāḥ kuśalamahābhaumāḥ| te puṇaḥ(naḥ)
[113] śraddhāpekṣā'pramādaśca prasrabdhirhrīrapatrapā|
mūlavīryamahiṃsā ca śubhabhūkā daśasmṛtāḥ||
tatra śraddhā cetasaḥ prasādo guṇiguṇārthitvābhisaṃpratyayākāraḥ, cittakāluṣyāpanāyī| tadyathodakaprasādako maṇiḥ sarasi prakṣiptaḥ sarvaṃ kāluṣyamapanīyācchatāmutpādayati tadvaci(cci)ttasarasi jātaḥ śraddhāmaṇiriti|
a[pra]mādaḥ kuśaladharmabhāvanā tadavahitatetyarthaḥ|
prasrabdhiścittakarmaṇyatā| kāyaprasrabghirapyasti| sā tu tadānukūlyādbodhyaṅgaśabdaṃ labhate| tadyathā prītiḥ| prītisthānīyāśca dharmāḥ prītibodhyaṅgamuktaṃ bhagavatā| samyagdṛṣṭisaṃkalpavyāyāmāśca prajñānukūlyāt prajñāskandha ityuktāḥ| tadvatkāyakarmaṇyatā cittakarmaṇyatā bodhyaṅgāvāhakatvāttacchabdenoktā|
upekṣā cittasamatā cittānābhogaḥ saṃskārāṇi(ni)mittābhogamadhyupekṣānimittapravana(ṇa)tā|
hrīḥ svātmāpekṣā| akāryakaraṇe lajjā|
apatrāpyantu parāpekṣāḥ (kṣam)|
dve tu kuśalamūle alobhādveṣau| amohastu prajñāsvabhāvatvānmahābhaumeṣūkta iti na gaṇyate|
vīrvaṃ kuśalākuśaladharmotpādanirodhābhyutsāhaḥ, saṃsāranimagnasya cetaso'bhyunnatirityarthaḥ|
avihiṃsā sattvāviheṭhanā|
uktāḥ kuśalamahābhaumāḥ||
[114] styānaṃ pramattirāśraddhyamālasyaṃ mūḍhiruddhati[:]|
kliṣṭe ṣaṭ
tatra
styānaṃ kāyacittākarmaṇyatā |
pramādaḥ kuśalānāṃ dharmāṇāmabhāvanā| bhāvanāvipakṣabhūto dharmaḥ|
āśraddhyaṃ cittāprasādaḥ, cittakāluṣyamityarthaḥ| guṇeṣu guṇavatsu cāsaṃpratyayo'narthitvaṃ ca|
kausīdyaṃ cittasyānabhyutsāhaḥ|
mūḍhiravidyānukārā'saṃprakhyānarūpā|
auddhatyaṃ cittasyāvyupaśamaḥ|
uktāḥ ṣaṭ kleśamahābhaumāḥ|
abhidharme tu daśa paṭhyante-"āśraddhaym, kausīdyam, muṣitasmṛtitā, cetaso vikṣepaḥ, avidyā, asaṃprajanyam, ayoniśo manasikāraḥ, mithyādhimokṣaḥ, auddhatyam, pramādaśca" iti|
tatra muṣitasmṛtivikṣepāsaṃprajanyāyoniśomanasikāramithyādhimokṣāḥ pañcamahābhaumeṣu paṭhitāḥ| kliṣṭā'kliṣṭānāmubhayeṣāṃ smṛtyādisvābhāvyāditīha na pṛthaggaṇyante| tasmāt ṣaḍeva kleśamahābhaumāḥ|
aśubhe tu dve āhrīkyamanapatrapā||
akuśale tu cetasi āhrīkyamanapatrāpyaṃ ca dvau dharmāvakuśalamahābhaumikau bhavataḥ| tatrāhrīkyaṃ hrīvipakṣabhūto dharmaḥ| anapatrāpyamapatrāpyasyeti| akāryaṃ kurvāṇasyālajjā svātmano[']hrīḥ| parebhyo[']lajjā anapatrāpyamityapare|
parīttakleśamahābhaumā nirdiśyante|
[115] māyāśāṭhyamadakrodhavihiṃserṣyāpradaṣṭayaḥ|
sūkṣmopaṇā(nā)hamātsaryāṇyalpakleśabhuvo daśa||
ete hi kleśā bhāvanāheyenāvidyāmātreṇa manobhūmikenaiva saṃprayujyante|
eṣāṃ tu lakṣaṇamupakleśacintāyāṃ pañcame'dhyāye'bhidhāyiṣyate||
kathaṃ puṇa(na)ridaṃ vijñāyate cittādarthāntarabhūtāścaitasikāḥ ? cittameva hi tadvedanādināmabhirvyapadiśyata ityevaṃ ceṣyamāne buddhasūtramanulomitaṃ bhavati| yaduktaṃ bhagavatā-“ṣaḍdhāturayaṃ bhikṣavaḥ puruṣapudgalaḥ” ityatra vijñānadhāturevoktaḥ| tasmānnārthāntarabhūtāścaitasikā iti bhadantabuddhadevaḥ| taṃ pratīdamabhidhīyate-
[116] pṛthivyādi yathā dravyaṃ nīlādiguṇayogataḥ|
taistairviśeṣyate śabdaiścaittayogānmanastathā||
yathā hi pṛthivīdhāturabdhāturvā rūparasagandhādyupādāyarūpairviśeṣyate| nīlā gra(grā)vāṇaḥ, nīlamudakaṃ madhurā drākṣā madhurāḥ kharjūrā madhurataro guḍa ityevaṃ sukhitaṃ cittaṃ duḥkhitaṃ cittaṃ samāhitaṃ cittaṃ sotsāhaṃ kusīdaṃ mūḍhaṃ raktaṃ dviṣṭamityevamādibhiḥ śabdaiścaitasikairdharmairyogādviśeṣyate| sādhyasamatvādayuktamiti cet| na| uktottaratvāt| vihitamatra- bhūtabhū(bhau)tikānyatvacintāyāmuttaramiti| tasmādviśeṣapratyayānāmanākasmikatvātsiddhamanyatvaṃ caitāsikānāmiti|
itaśca cittacaitasikānyatvam-
[117] bhūtabhautikanānātvaṃ svarūpehākṛtaṃ yathā|
tathaiva cittacaittānāṃ pṛthaktvamupadhāryatām||
yathā khalu bhūtānāṃ bhautikasya ca rūpasya svabhāvabhedāt, kriyābhedāccānyatvam; tathā cittasya caittānāṃ ca svabhāvakriyābhedādanyatvaṃ draṣṭavyam||
[118] yathā saṃbandhisaṃbandhādvikāro'mbhasi lakṣyate|
tathā saṃsargisaṃsargāccetovikṛtirīkṣyatām||
yathā khalu vahniharītakīguḍalavaṇādidravyasaṃbandhādvikāro'mbuni dṛśyate, uṣṇamamblaṃ kaṣāyaṃ madhuraṃ lavana(ṇa)miti| tadvaccaitasikasaṃbandhāccittamapi sukhitaṃ duḥkhitaṃ prasannamabhyunnataṃ sālokaṃ sāndhakāramiti|
sūtre'pi cānyatvamuktam-“saṃjñā ca vedanā ca caitasika eṣa dharmaḥ” iti||
idamidānīṃ vaktavyam| yugapadutpannānāṃ cittacaitasikānāṃ dharmāṇāṃ kathaṃ caitasikā dharmā ityucyante ? ko vā dharmārthaḥ? tadapadiśyate-
[119] guṇo viśeṣaṇaṃ dharmo mātrāvṛttistathāśrayī|
ityevamādayaḥ śabdāḥ pradhānāpekṣavṛttayaḥ||
pradhānaṃ hi dravyaṃ viśeṣyabhūtamapekṣyaḥ(kṣya) guṇadharmaviśeṣeṇa mātrāvṛttayaḥ śabdāḥ pravartante| ki puṇa(na)ratra pradhānam ?
[120] cittaṃ pradhānameteṣāṃ
kuta iti cet|
vastumātragrahādibhiḥ|
vastūpalabdhimātraṃ hi cittaṃ tenopalabdhe vastuni saṃjñāsmaraṇe lakṣaṇānusmaraṇābhinirūpaṇādayo viśeṣāḥ saṃjñāprajñāsmṛtyādibhirgṛhyante| ‘ādi’grahaṇādatrātmābhiniveśādrājasthānīyatvācca| kiñca,
bījaṃ caitatpravṛttīnāṃ śuddhisaṃkarayorapi||
uktaṃ hi bhagavatā-“cittasaṃkleśātsattvāḥ saṃkliśyante | cittavyavadānahetorviśudhyante” iti| tasmātpradhānaṃ cittam| yathoktam-
“dūraṅgamamekacaramaśarīraṃ guhāśayam|
ye citta(ttaṃ) damayiṣyanti te mokṣyante mārabandhanāt||”
tatra dūraṅgamaṃ śāstuḥ sarvalokadhātusthavineyakāryakaraṇāt| ekacaraṃ yugapad dvitīyacittābhāvāt| aśarīraṃ mūrtyabhāvāt, kriyāmātrānumeyasvabhāvatvācca| guhāśayaṃ śarīrabalena| tadvṛttivyakteriti| tasya dharmāḥ saṃprayogiṇaścaitasikā iti|
vyākhyātāḥ pañcaprakārāścaittāḥ| anye'pi cāniyatāḥ paṭhyante-vitarkavicārakaukṛtyamiddhādayaḥ|
tatredaṃ vaktavyam| kasmiṃścitte kati caittā bhavanti ?
kāmāvacaraṃ tāvat pañcaprakāraṃ cittam| kuśalam, akuśalaṃ dvividhamāveṇikamanyatkleśasaṃprayuktaṃ ca| avyākṛtaṃ dvividhaṃ nivṛtānivṛtāvyākṛtākhyam||
tatra tāvatkāmāvacaraṃ cittamavaśyaṃ savitarkasavicāram| atastat
[121] abhyudgacchati kāmāptaṃ dharmairdvādaśabhiḥ saha|
akliṣṭāvyākṛtaṃ cittaṃ raśmivāniva raśmibhiḥ||
kāmāvacaramanivṛtāvyākṛtaṃ cittaṃ daśabhirmahāmaumairvitarkavicārābhyāṃ ca sahāvaśyamudeti||
[122] tathāṣṭādaśabhiścittairnivṛtaṃ jāyate manaḥ|
satkāyāntagrāhadṛṣṭisamprayuktaṃ cittaṃ kāmadhātau nivṛtāvyākṛtam| tatrāṣṭādaśa caitasikā bhavanti| daśamahābhaumāḥ[ṣaṭ kleśamahābhaumāḥ] vitarkavicārau ca| dṛṣṭirnādhikā pūrva[vat]|
dvāviṃśatyā sahāvaśyaṃ śubhaṃ bhavati mānasam||
daśamahābhaumāḥ daśakuśalamahābhaumāḥ vitarkavicārau ca||
[123] cetasossaha viṃśatyā cittamutpadyate'śubham|
yadakuśalaṃ cittamāveni(ṇi)kaṃ tatra viṃśatiścaittāḥ-daśamahābhaumāḥ ṣaḍle(kle)śamahābhaumā dvāvakuśalamahābhaumau vitarko vicāraśca| āveṇikaṃ nāma cittaṃ yatrāvidyaiva kevalā nānyaḥ kleśo'sti rāgādiḥ|
dṛṅmohamātrayuktaṃ yat
dṛṣṭiyukte'pyakuśale viṃśatirya evāveni(ṇa)ke| nanu ca dṛṣṭiradhikā ? nādhikā, prajñāviśeṣa eva hi kaścid dṛṣṭirityucyate| sa ca mahābhaumeṣu paṭhitaḥ|
kaḥ puṇa(na)rayaṃ vitarkaḥ ko vā vicāraḥ ? vitarko ṇā(nā)ma cittaudāryalakṣaṇaḥ saṃkalpadvitīyanāmā viṣayanimittaprakāravikalpī saṃjñāpavanoddhatavṛttiḥ, audārikapañcavijñānakāyapravṛttihetuḥ| vicārastu cittasaukṣmyalakṣaṇo manovijñānapravṛttyanukūla(laḥ)| ityetau dvau dharmau kāmāvacare cetasi sarvasminniyamenotpadyete|
tadidamatisāhasaṃ vartate yadviruddhayorapi dvayordharmayorekatra citte samavadhānaṃ pratijñāyate| na hyetalloke dṛṣṭaṃ yadviruddhayorekatra sahāvasthānamiti kośakāraḥ|
tatra kecidāhuḥ-sarpiryathā'psu niṣṭhyūtaṃ nātiśyāyate nātivilīyate, evaṃ vitarkavicārayogāccittaṃ nātisūkṣmaṃ bhavati nātyudāramityubhayorapi tatra vyāpāraḥ| evaṃ tarhi ṇi(ni)mittabhūtau vitarkavicārāvaudāryasūkṣmatayoḥ prāpnuto yathā''paścātaśca sarpiṣaḥśyānatvavilīnatvayorṇa(rna) puṇa(na)statsvabhāvau|
anye puṇa(na)rāhuḥ-vāksaṃskārā vitarkavicārāḥ sūtre'bhihitāḥ|
“vitarkya vicārya vācaṃ bhāṣate nāvitarkyāvicārya” iti| tatra ya audāryāste vitarkāḥ| ye sūkṣmāste vicārāḥ| yadi caikatra citte'nyo dharma audāriko'nyaḥ sūkṣmaḥ ko'tra virodha iti ? na virodho yadi jātibhedaḥ syāt| ekasyāntu jātau mṛdvadhimātratā yugapanna saṃbhavati| jātibhedo'pyasti sa tarhi vaktavyaḥ| durvaco hyasau| ato mṛdvadhimātratayā vyajyate| naivaṃ vyakto bhavati| pratyekaṃ jātīnāṃ mṛdvadhimātratvāt|
tadidamanghavilāsinīkaṭākṣaguṇotkīrtaṇa (na)kalpaṃ codyamārabhyate| yadanavabudhya tallakṣaṇaṃ codyavidhiḥ mithyā pratārya(ya) te| tayorhi yathoktalakṣaṇayorekasmiṃścetasi sadbhāvamātraṃ pratijñāyate na yugapad vṛttyudrekatālābhaḥ| yathā vidyavidyayoḥ saṃśayanirṇayayośceti tūṣṇīmāsva| mā vidvadbhiravajīhasaḥ svamātmānam|
sā punardṛṣṭistriprakārā mithyādṛṣṭyādyā veditavyāḥ|
krodhādyaistvadhikaṃ vadet||
krodhādyaistūpakleśairadhikaṃ bhavati| sa ca krodhādirupakleśo'dhikaḥ| kleśaiśca saṃprayuktaṃ rāgapratighamānavicikitsābhiśca yuktaṃ cittaṃ tena ca kleśādhikaṃ bhavatītyekaviṃśatirbhavanti||
[124] sarvatra saṃbhavānmiddhaṃ yatra syāttatra nirdiśet|
tadvadeva ca kaukṛtyamadhikaṃ gaṇayetkvacit||
yatra middhaṃ tatra tadevādhikaṃ gaṇayet| yatrāpi tadevādhikamiti ya eṣa kāmadhātau caittānāṃ niyama u[ktasta]taḥ||
[125] sāśubhaṃ middhakaukṛtyaṃ rūpadhātau na vidyate|
dhyānāntare vitarkaśca vicāraścāpi nopari||
na kiñcidakuśalaṃ middhaṃ kaukṛtyaṃ ca prathamadhyānādau vidyate| tena tatra pratighaśāṭhyamadamāyāvarjyāśca krodhādayaḥ, āhrīkyānapatrāpye ca na santi| ya eva prathame dhyāne santi ta eva ‘dhyānāntare’, ‘vitarkaśca na vidyate| pūrvoktāśca na santīti ‘ca’śabdāt| vicāraścāpi nopari|’ dhyānāntarāttūparivicāraścāpi nāsti pūrvoktāśca| ‘ca’śabdāt māyā śāṭhyaṃ ca nāstīti gamyate|
brahmano(ṇo) hi yāvacchāṭhyaṃ paṭhyate, parṣatsaṃbandhāt| sa hi svasyāṃ parṣadi aśvajitā bhikṣuṇā praśnaṃ pṛṣṭaḥ “kutra tāni catvāri mahābhūtānyapariśeṣaṃ nirudhyante” ityaprajānan kṣepamakārṣīt-“ahamasmi brahmā mahābrahmā īśvaraḥ karttā nirmātā sraṣṭā sṛjaḥ pitṛbhūto bhāvānām” iti| gatamidam||
idaṃ vaktavyam| saṃprayuktāḥ saṃskārāḥ kasmāducyante ? tadārabhyate|
[126] saṃprayuktaḥ saṃskāraḥ samatā yasya pañcadhā|
viprayuktaśca boddhavyaḥ samatā yasya nāstyasau||
pañcabhiḥ samatābhiḥ saṃprayuktāḥ saṃprayuktāḥ| tāḥ punarāśrayālambanākārakāladravyasamatākhyāḥ| “yathaiva hyekaṃ cittamevaṃ caittā apyekaikāḥ” iti vistaraḥ| yasya puṇa(na)retāḥ samatā na vidyante sa viprayukta iti||
codakaḥ-kaścidrūpaṃ tarhi viprayuktaṃ prāpnoti, asaṃskṛtaṃ ceti ? saṃpratyucyate|
[127] viśiṣṭāṇā(nā)masadbhāvātprasaṃgo nāsti rūpiṇām|
saṃskāragrahaṇāccaiva khādīnāṃ ṇa(na) prasajyate||
viśiṣṭena khalu nirogeṇa(niyogena) rūpiṣu saṃjñā sanniviśanta iti teṣvaprasaṃgaḥ| saṃskāragrahaṇācca khādiṣu viprayuktasaṃjñā na pravartata iti siddham||
ke punaste viprayuktāḥ saṃskārāḥ ? kiyanto veti ? nahi vayameteṣāṃ svabhāvamupalabhāmahe| nāpi kṛtyam| nacaite dharmā loke prasiddhā nāpi buddhavacane| na vedādiṣu śāstreṣviti| tadatropavyāhrīyate-
[128] prāptyādayastu saṃskārā viprayuktāstrayodaśa|
āptoktisvakriyāliṅgā liṅgameṣāṃ gadiṣyate||
yattāvat svabhāvakriyābhāvāditi| tadatrobhayamabhidhāyiṣyate| yadapi buddhavacane na paṭhyanta iti| tatrāpyāptavacanaṃ sārvajñaṃ vyāhariṣyate| yatta loke na vedādiṣu paṭhyanta iti taccodyam| ye khalu sarvajñaviṣayā dharmāḥ pratisaṃvillābhināṃ buddhivṛttiviṣayamāyāntyāryamaitreyasthaviravasumitrācāryāśvaghoṣapramukhāṇāṃ(nāṃ) ca bodhisattvānāṃ buddhiprasādavidhāyinastejolpānāṃ stanandhayabudvīnāmabhidharmaparīkṣamativṛttīnāṃ ca kathaṃ sāndhakāreṣu manassu gocaratāmāyāntīti||
tatra tāvat
[129ab.] prāptiḥ samanvitirlabdhirdharmavattā vyavasthitiḥ|
prāptarṇā(rnā)ma samanvāgamo lābha iti paryāyaḥ| sarvathā bhāvāñchabdaireva śabdānācaṣṭe| yathaiṃva khalu prāptirityetacchabdagaḍumātraṃ śrūyate tathaiva samanvāgamo lābha ityetadapi padadvayaṃ vāgvastumātramiti na paryāyanāmnā lakṣaṇamudyotitaṃ bhavati| tasmādavyabhicāri tatprasāda(dha)kaṃ liṅgamucyatām| ime brū maḥ| śrota(tra)mavadhatsva manaścaikāgratāyāṃ sanniyuktvā| ‘dharmavattā vyavasthitiḥ|’ dharmāḥ khalu tridhā kuśa[lāḥ].........
............rūpe'pi kuśalayā vijñaptyā vartamānayā yāvadvijñāpayati, atītayā ca samanvāgataḥ|
[130cd.] śrutacintāmayānāṃ ca samāpattidvayasya ca|
śrutacintāmayānāmapi| sahajā paścād bhavati dvayoścāści(ci)tta samāpattyossaha paścād bhavatīti|
[131] ni[:]kleśasaṃskṛtāpūrva(rvaṃ) śubhānāṃ tu rajasvatām|
ādilābhe saha prākca tadūrdhvaṃ vā tridheṣyate||
anāsravānāṃ(ṇāṃ) ca skandhānāṃ, anucitānāṃ ca kuśalasāsravānāṃ(ṇāṃ) na pūrvajā| eṣāmeva yattoktānāṃ ‘tadūrdhvaṃ tu tṛ(tri)dheṣyate|’ yadā tena saṃmukhībhūtā tadā dvidhaiveti vartate||
[132] kliṣṭāṇāṃ kuśalānāṃ ca tadanyeṣāṃ tridhā matā|
kliṣṭāṇāṃ ca skanghānāṃ traiyadhvikī prāptiḥ| ‘kuśalānāṃ ca tadanyeṣāṃ’ tebhyo'nāsravebhyastebhyaścānucittebhyaḥ kuśalasāsravebhyo'nyeṣāṃ kuśalasāsravānāṃ(ṇāṃ) traiyadhvikyeva|
nivṛtāvyākṛtā jñānanirmāṇamanasāṃ tathā||
traiyadhvikīti vartate||
[133] nirvāṇasyādito lābhe nityasyānyasya sarvadā|
nirvāṇasya tatprathamato lābhe dvaiyadhvikyeva| anāgatavartamānālabdhasyātītā'pi| ‘nityasyānyasya sarvadā|’
ajā tavartamānā ca
apratisaṃkhyānirodhasyānāgatavartamānaiva nityam|
kadācittu tridheṣyate||
yena labdhastasya traiyaghvikītyuktametat|
vyākhyāte prāptyaprāptī||
sabhāgatā vaktavyā| keyaṃ sabhāgatā nāma ? nahīha pravacane tīrthyaparikalpitasāmānyaviśeṣapadārthagandho'pyasti| tatkeyaṃ tadabhyāsagateti ? tadidaṃ pratārya (ya)te|
[134] ekārtharuciheturyaḥ sattvānāṃ sa sabhāgatā|
sabhāgatā nāma dravyam| sattvānāmekārtharuciḥ sādṛśyahetubhūtam| nikāyasabhāga ityasya śāstrasaṃjñā| sā punarabhinnā bhinnā ca| abhinnā sarvasatvānāṃ sattvasabhāgatā| sā pratisattvaṃ sarveṣvātmasnehāhāraratisāmyāt| bhinnā punasteṣāmeva sattvānāṃ dhātubhūmigatiyonijātistrīpuruṣopāsakabhikṣuśaikṣāśaikṣādīnāmekārtharucitvabhedapratiniyamahetuḥ| tasyāṃ khalvasatyāṃ sarvāryāṇā(nā)ryalokavyavahārasaṃkaradoṣaḥ prasajyeta| tasyāṃ tu satyāmeṣa doṣo na bhavatītyasti sabhāgatā nāma dharmaḥ, ‘ekārtharucihetuḥ’ iti|
syāccyavetopapadyeta na ca sva[sa]bhāgatāṃ vijahyāt, na [ca] pratilabheteti ? catuṣkoṭikaḥ| prathamā kauṭiḥ-yataścyavate tatravopa[pa]dyamānaḥ| dvitīyā-niyāmamavakrāman, sa hi pṛthagjanasabhāgatāṃ vijahātyāryasabhāgatāṃ pratilabhate| tṛtīyā-gatisaṃcārāt| caturthī-etānākārān sthāpayitvā|
atha pṛthagjaṇa(na)tvasyāsyāśca kaḥ prativiśeṣaḥ ? pṛthagjanasabhāgatā khalūktarūpā| pṛthagjanatvaṃ tu sarvānarthakarabhūtamiti sumahāṃstadviśeṣaḥ| āptavacanenāpi tadanyatvasiddhiḥ| uktaṃ hi bhagavatā-“sa ceditthatvamāgacchati manuṣyānāṃ(ṇāṃ) sabhāgatāṃ pratilabhate” iti| na caivaṃ pṛthagjanatvaṃ pratilabhyate vā tyajyate vā|
siddhā sabhāgatā| kośakāraḥ punastāṃ vaiśeṣikaparikalpitajātipadārtheṇa(na) samīkurvan vyaktaṃ pāyasavāyasayorvarṇasādharmyaṃ paśyatīti||
atha kimidamāsaṃjñikaṃ nāma ? tadapadiśyate|
āsaṃjñikaṃ vipāko yaccittopacchedyasaṃjñiṣu||
asaṃjñisattveṣu deveṣūpapannānāṃ yaccittopacche didharmāntaraṃ viprayuktaṃ vipākajamutpadyate tadāsaṃjñikaṃ nāma| yena tatropapannānāṃ cittamanāgatve(te)'dhvani kālāntaraṃ sannirudhyate, notpattuṃ labhate| tatpunarekāntena vipākajasvabhāvam| kasya vipākaḥ ? asaṃjñisamāpatteḥ pūrakasya karmaṇaḥ| keṣu pu[nastat] ? devanikāyeṣu bhavati| tadāha-“asaṃjñiṣu| asaṃjñisattvā nāma devā bṛhatphaladevanikāyasaṃgṛhītā dhyānāntarikāvat|” kiṃ punaste naiva kadācit saṃjñino bhavanti ? bhavantyutpattikāle cyutikāle ca| “prakṛṣṭamapi kālaṃ [sthitvā saha]saṃjñotpādātteṣāṃ sattvānāṃ tasmāt sthānāccyutirbhavati” iti sūtrapāṭhaḥ| te ca tato dīrghasvapnavyutthitā iva cyutvā kāmadhātāvupapadyante, nānyatra| tadupapannānāmavaśyaṃ kāmāvacarā'paraparyāyavedanīyakarmasadbhāvāt| yathottarakauravānāṃ(ṇāṃ) devopapattivedanīyaṃ karmeti||
kā punarasāvasaṃjñisamāpattiriti ? tadapadiśyate-
[135] śubhā'saṃjñisamāpattirdhyāne'ntye cittarodhinī|
āsaṃjñikamavyākṛtam| vipākaphalatvāt| iyaṃ tu śubhāḥ(bhā)| sā punariyaṃ ‘dhyāne'ntye’ caturthadhyānasaṃgṛhītetyarthaḥ| ‘cittarodhinī’, yathaiva tatphalaṃ cittasannirodhi tathaiveyamapi cittasaṃrodhinī| cittagrahaṇācca caittānāmanuktasiddhirādityāstagamane kiraṇāstagamanavat|
kimarthaṃ puṇa(na)retāṃ yogiṇaḥ(naḥ) samāpadyante ?
niḥsṛtīcchāpravṛttitvāt
te hi nissaraṇasaṃjñāpūrvakeṇa manaskāreṇa tāṃ samāpadyante mokṣakāṅkṣayā| sā punariyam-
nāryasya
āryā hi tāmapāyasthānamiva manyante| pṛthagjanāstu kecinmokṣasthānamiti|
kiṃ puṇa(na)riyamupapattyā vā vairāgyeṇa vā labhyate ? netyāha| kiṃ tarhi ?
āpyā prayogataḥ||
yatnena tāmutpādayatīti||
[136] nirodhākhyā tu vijñeyā vijihīrṣorbhavāgrajā||
nirodhasamāpattirapi cittacaittānāṃ dharmāṇāṃ kañcitkālamutpattisannirodhinī| sā punariyaṃ vihārasaṃjñāpūvakena(ṇa) manasikāreṇa nirvāṇasadṛśaṃ sukhamanubhavitukāmairyogibhiḥ saṃmukhīkriyate| ‘bhavāgrajā’ ceyaṃ samāpattiḥ|
śubhā'ryaṃsya prayogāpyā dvivedyā'niyatā matā||
dvayoḥ kālayorvedyā ‘dvivedyā’| upapadyavedanīyā cāparaparyāyavedanīyā ca| aniyatavedanīyā ceyam| yo hyetāmutpādya pariṇi(ni)rvāti sa nāsyā vipākaṃ pratisaṃvedayate| tasyā hi bhavāgre catuskandhako vipāko vipacyate| āryaścaitāmutpādayituṃ śaknoti nānāryaḥ| ucchedabhīrutvācchāśvatadṛṣṭiprahānā(ṇā)dāryamārgavalotpādanācca| āryasyāpi ceyaṃ prayogalabhyā na vairāgyalabhyeti|
atra punaḥ kośakāraḥ pratijānīte-“sacittikeyaṃ samāpattiḥ” iti| “samāpatticittameva hi taccittāntaraviruddhamutpadyate| yena kālāntaramanyasya cittasyāpravṛttimātraṃ bhavati| tadviruddhāśrayāpādanāt sā'sau samāpattiriti prajñāpyate|”
tadetadabauddhīyam| kutaḥ ?
[137] cetaścatuṣṭayāyogādāgamādupapattitaḥ|
nirveditamanobhāvātsiddhyatīyamacittikā||
bhavāgre khalu catvāri cittāni vidyante| vipākajaṃ nivṛtāvyākṛtaṃ kuśalamupapattilābhikaṃ prāyogikaṃ ca| tebhyaścaturbhyaḥ kataraccittaṃ yannirodhasamāpannasyānyacittanirodhītyucyate ?
tatra tāvadvipākajaṃ tatratyāṃ .............................
“.............dharme pratipattyevājñāmārādhayati| nāpi maraṇakālasamaye| bhedācca kāyasyātikramya devān kabaḍīkārabhakṣānanyatamasmin divye manomaye kāya upapadyate| sa tatropapannaḥ [abhokṣṇaṃ] saṃjñāveditanirodhaṃ samāpadyate ca vyuttiṣṭhate ca| asti caitatsthānamiti yathābhūtaṃ prajānāti” iti|
atra sthavira udāyī sthaviraśāri[pu]tramidamavocat-“mā tvamāyuṣmannevaṃ vocaḥ|” sa hi manyate sma bhāvāgrīkīyaṃ samāpattirdivyaśca manomayaḥ kāyaścaturthaghyānabhūmika ukto bhagavatā tatkathametadupapatsyate| tadetad bhadantodāyinā parihāni(ṇi)majānānenābhidharmasaṃmūḍhena pratyuktaḥ sa bhagavatā paramābhidhā makeṇāvasādanārthamabhihitaḥ-“tvamapi mohapuruṣa śāriputreṇa bhikṣuṇā sārdhaṃ gabhbhīre'bhidharme saṃlapituṃ manyase ?” [iti]
nikāyāntarīyāścaturthaghyānabhūmikāmapi nirodhasamāpattimicchanti| teṣāṃ vinā parihānyā(ṇyā) siddhatyetatsūtra[m]| ye (e)tadeva tu na siddhyati-caturthadhyānabhūmikāpyasāvastīti| katham ? “navānupūrvasamāpattayaḥ” iti sūtre vacanāt| prāptakāmavaśitvāttu santaḥ paścādvilaṃdhyāpi vyutkrāntasamāpattiṃ samāpadyanta iti||
vyākhyāte samāpattī|
[138] gatiprajñaptyupādānamāyuścittoṣmaṇoḥ sthitiḥ|
āgamādyuktitaścaiva dravyatastatsadiṣyate||
āyurjīvitamityanarthāntaram| uktaṃ hyabhidharme-“jīvitendriyaṃ katarat ? traidhātukamāyuḥ” iti| tatpunaḥ ‘gatiprajñaptyupādānaṃ’ vipākajasvabhāvatvāt| uktaṃ hi sūtre-“nirvṛtte vipāke nāraka iti saṃkhyāṃ gacchati| evaṃ yāvannavasaṃjñānāsaṃjñāyatanopagasaṃkhyāṃ gacchati” iti| na cānyadindriyaṃ vipākajaṃ traidhātuka vyāpyasti yajjanmaprabandhā'vicchedena vartamānaṃ gatiprajñaptyupādānaṃ syāt, anyatra jīvitendriyāt|
tatpunarastīti kathaṃ gamyate ? āgamādyuktitaśca| āgamastāvadayam-
“āyuruṣmātha vijñānaṃ yadā kāyaṃ jahatyamī|
apaviddhastadā śete yathā kāṣṭhamacetanam||”
sarvaṃ hi jīvitendriyaṃ kāmadhātāvavaśyaṃ kāyendriyoṣmasahacariṣṇu| tattvavaśyaṃ vijñānasahavarti nāpi cakṣurādīndriyasahavarti| rūpadhātau tu sarvaṃ kāyādipañcendriyasahavarti| na tvavaśyaṃ cittasahacariṣṇa| ārūpyadhātau tu sarvaṃ vijñānasahavarti, anyatra nirodhasamāpatteḥ|
jīvitendriyaṃ gatiprajñaptyupādānamastīti dravyam| anyathā hi kuśalanivṛtte cetasi nirmalo(le) vā'dhobhaume tadgatiprajñaptyupādānavipākajaṃ kiṃ kalpyeta yatsadbhāvādasau tato na pracyutaḥ syāt ? na ca śakyaṃ pratijñātumanāsravānā(ṇā)[ma]dhobhūmivijñānabījaṃ tadgatisaṃjñaptyupādānaṃ kalpayitum, anāsravasya cittasya samucchedāya pravṛttatvāt| na cānyadvijñānaṃ tadbhaumaṃ śakyaṃ kalpayituṃ manovijñānadhātuvyatiriktasyānākāramālambanasya vijñānasyāprasiddhatvāt| manodhāturiti cet| na| manovijñānadhātorevāvasthāntare tannāmaprajñapteḥ| yuktirapi-cakṣurādivattadādhipatyaviśeṣāt|
“samādhibalena karmajaṃ jīvitāvedhaṃ nirvartyāyuḥ saṃskārādhiṣṭhānajam, āyurna vipākaḥ” iti kośakāraḥ| tatra kimuttaramiti ? na tatrāvaśyamuttaraṃ vaktavyaṃ yasmānnaitatsūtre'varati, vinaye na saṃdṛśyate, dharmatāṃ ca viloma yati| tasmād bālavacanavadadhyupekṣyametat|
kathaṃ tāvatsūtre nāvatarati, vinaye na saṃdṛśyate ? sūtre hyaktam- “asthānamanavaka śo yatprahāna(ṇa)hetorvā upakramahetorvā apakvaṃ paripācayet, paripakvaṃ vā anyena nayena nayet” iti vistaraḥ|
vinaye'pi “niyatavedanīyaṃ tri[prakā]raṃ karma sadevakenāpi lokena na śakyaṃ vyāvartayitum” iti parigrahaḥ|
abhidharme'pi sarvāparimitamāyurākṣipyate| tasyāpakṣālāḥ kālasthānāntarāvasthānādiṣu niyamyante| ityevaṃ tāvadāgamādapetaṃ nottarārham|
tathāpi tu yuktimaduttaramucyate| yadi bhagavān samādhibalena svecchayā[']pūrvaṃ sattvaṃ savijñānakaṃ sendriyamutpādayet, svātmano vā jīvitamanākṣiptaṃ prākkarmabhiryogabalenākṣipet, tato buddho bhagavānnārāyanī(ṇī)kṛtaḥ syāt apūrvasattvanirmāṇāt| sa ca kāruṇikatvānneva pariṇi(ni)rvāyāt, śāsanaṃ(na)sambhedasaṃdehāṃśca cchindyāt| tasmādvaitulikaśāstrapraveśadvāramārabdhaṃ tena bhadantenetyadhyupekṣa metat|
atha kimāyuḥkṣayādeva maraṇaṃ bhavatyāhosvidanyathā'pi ? prajñaptyāmuktam-“astyāyuḥkṣayānmaraṇaṃ na puṇyakṣayādibhiḥ? catuṣkoṭikaḥ| prathamā koṭiḥ-āyuviṃpākasya karmaṇaḥ paryādānāt| dvitīyā-bhogavipākasya| tṛtīyā-ubhayoḥ| turthī-viṣamāparihāreṇa|
jñānaprasthāna uktam-“āyuḥ santatyupanibaddhaṃ vartata iti vaktavyam ? sakṛdutpannaṃ tiṣṭhatīti vaktavyam ? āha-kāmāvacarāṇāṃ sattvānāmasaṃjñisamāpattiṃ nirodhasamāpattiṃ vā samāpannānāṃ santatyupanibaddhaṃ vartata iti vaktavyam| samāpannānāṃ santatyupanibaddhaṃ vartata iti vaktavyam| samāpannānāṃ rūpārupyāvacarāṇāṃ ca sattvānāṃ sakṛdutpannaṃ tiṣṭhatīti vaktavyam||”
kaḥ puṇa(na)rasya bhāṣitasyārthaḥ ? yasyāśrayopaghātādupadhātastatsantatyadhīnatvāt prathamam| yasyāśrayopaghāta eva nāsti tadyathotpannāvasthānād dvitīyam| sāntarāyaṃ prathamaṃ nirantarāyaṃ dvitīyamiti kāśmīrāḥ| tasmādastyakālamṛtyuḥ|
sūtra uktam-“catvāra ātmabhāvapratilambhāḥ| astyātmabhāvapratilambho yatrātmasaṃcetanā krāmati na parasaṃcetanā” iti catuṣkoṭikaḥ| ātmasaṃcetanāvakrāmati kāmadhātau krīḍāpramoṣakāṇāṃ devānāṃ manaḥpradoṣakāṇāṃ ca devānām| teṣāṃ hi praharṣamanaḥpradoṣābhyāṃ tasmātsthānāccyutibhaṃvati, nānyathā| buddhānāṃ ceti vaktavyam, svayaṃmṛtyutvāt| parasaṃcetanaiva krāmati garbhāṇḍāgatānām| ubhayam-anyeṣāṃ kāmāvacarāṇāṃ prāyeṇa| nobhayam-sarveṣāmantarābhavikānāṃ rūpārūpyāvacarāṇāmekatīyānāṃ ca kāmāvacarāṇām| tadyathā nārakāṇāṃ ca darśaṇa(na)mārgamaitrīnirodhasamāpattisamāpannānāṃ rājarṣijinadūtajinādiṣṭaprabhṛtīnāṃ sarveṣāṃ ca caramabhavikānāṃ bodhisattvānāṃ mātustadgarbhāyāścakravartiṇa(na)śca tadgarbhāyāḥ|“
vyākhyātaṃ jīvitendrim||
saṃskṛtalakṣaṇānīdānīṃ vyākhyāyiṣyante| tāni puṇaḥ (naḥ) kāni kiyanti veti ? tadupavyākhyāyate-
[139] jātiḥ sthitirjarāṇā(nā)śaḥ saṃskṛtāṅkacaṣṭatuyī|
etāni khalu catvāri saṃskṛtalakṣaṇāni bhagavatā'bhidharme'bhihitāni| etānyeva vineyaprayojanavaśāt sūtre sthityanyathātvamekīkṛtya trīṇyuktāni| gāthāyāṃ tvebhyo'ṅgadvayaṃ sāmarthyādgamyamānamantarṇīya pradarśyate| sthitirhi dharmāyogamicchantī taddharmamupaguhyāvatiṣṭhate| sā ca tathā pravartamānā lokasya cittonnativiśeṣaṃ janayati| tato bhagavatā'nyathātvākhyayā jarayā sahoktā śrīriva kālakarṇyānubaddhā saṃvegānukūlā bhaviṣyatītyeṣo'rtha[vi]ṣayo dṛśyate| tasmāccatvāri| itaśca-
catvāri sthitināstitve hetutvādyaprasiddhitaḥ||
yadi hi dharmasya sthitirṇa(rna) syāt, tasyātmanyavasthitasya hetvākhyaḥ śaktiprabhāvaviśeṣo na syāt| anityatāgra[sta]sya ca notpaktiśaktirityataśca kriyāṃ na kuryāt| kriyā'bhāvātphalābhāvaḥ syāt| phalārthaścāyamārambhaḥ| tasmādāstikairṇā(rnā)stikapakṣaṃ vikṣipya sthitiḥ pratigṛhyata iti siddham||
catvārīti na siddhyanti jarābhāvāt| bhavatu sthitiḥ, jarā tu sarvathā na yujyate| katham ? uktaṃ hi-
”tathātvena jarāsiddhiraṇya(nya)thātve'nya eva saḥ|
tasmānai(nnai)kasya bhāvasya jarā nāmopapadyate||”
taṃ pratīdamucyate-
[140] śaktihānerjarāsiddhiḥ
unmiṣito hi dharmo jāyate hṛṣitaḥ phalamākṣipatīti| tasya yadi jarasā śaktirna vihanyeta sa dvitīyamapi phalamākṣipeta| na ca śaknotyākṣeptum | tasmādgamyate kaścijjarākhyaḥ śatruastaṃ jarjarīkṛtyopahṛtasāmarthyamanityatāpiśācyāḥ samarpayatīti yuktamuktam ‘śaktihānerjarāsiddhiḥ’ iti| naitadyuktamuktaṃ pariṇāmadoṣaprasaṅgāt| evaṃ laghvācakṣāṇena bhavatā sāṃkhyīyaḥ pariṇāmo'bhyupagato bhavati| nābhyupagataḥ, yasmāt-
nānyatvāt pariṇāmitā|
anya eva hi no jarākhyo dharmo, anyaśca dharmī| sāṃkhyasya tvavasthitasya dharmiṇaḥ svātmabhūtasya dharmāntarasyotsargaḥ svātmabhūtasya cotpādaḥ pariṇāma iti|
kathaṃ puṇaḥ(naḥ) kṣaṇikasya dharmasya śaktihānirbhavati ? evam-yasmādasyājahadātmakasya-
ekakāritranāśābhyāṃ śaktihāniḥ prasiddhyati||
yena khalu dārḍhyeṇo(no)peto yamekaṃ phalamākṣipate, yadi tenaiva yuktaḥ syād dvitīyamapyākṣipet| na cainaṃ śaktimantamanityatā hiṃsyāt| tasmād gamyate'nyathībhūto'yamanityatāvyāghrīmukhaṃ praviśati| ityekaṃ phalamākṣipya naśyatītyuktametat-‘ekakāritranāśābhyāṃ śaktihāniḥ prasiddhyati|’
na prasiddhyati, nirhetukatvādvināśasya| ye hyarthatmāno hetumantaste khalvanityā dṛṣṭāḥ| katham ? aṃkuravat| na vināśasya vināśo'sti, tasmādahetukaḥ| kiñca, ye cārthātmānaḥ paścādbhavanti teṣāṃ pūrvaheturasti tadyathā bhasmano bījādisaṃyogaḥ| na ca vināśasya heturasti| tasmādasau na paścādbhavatīti| tatra yaduktaṃ jātasya sthityanyathātvamapekṣya vināśo bhavatīti tadayuktam| atra pratyavasthānam-
[141] sati janmani tadbhāvād dravyakāritranāśataḥ|
āgamādupapatteśca vināśo'pi sahetukaḥ|
saheturvināśa iti sthāpanā| kutaḥ ? ‘sati janmani tadbhāvāt |’ uktaṃ hi bhagavatā-“asmin satīdaṃ bhavati| yāvadavidyāpratyayāḥ saṃskārāḥ |” sati cotpattimati vināśo bhavati| tasmātsahetukaḥ| yasya punarahetukastasya prāgapi janmanaḥ so'stīti janmaiva na syāt, viruddhānāmanyataropapatteḥ| tayoravirodhādvā tadvyapadeśānupapattiratāddharmyaṃ ca saṃskārāṇāmiti|
dharmā(rma)ṇā(nā)stitvamātraṃ vināśa iti cet| na| tadastitvapūrvakatvāt| astitvapūrvakaṃ hi tannāstitvamiti tadapi sahetukam| nāsti kiñcittaditi cet| na| astitvavirodhānupapatteḥ| kiñca, bhāvavirodhitve satyabhāvasya bhavatāpatteḥ| avi[rodhi]tve bhāvanityatvaprasaṃgādubhayābhāve vāṅmātratvāt| kā caiṣā vāco yuktiḥ sati ca bhavati tadviśeṣyaścātadvirodhī ca| na ca kiñcidityevaiṣā vācoyuktirasaṃbaddhāḥ(ddhā)| nirarthikā caiṣā vācoyuktiḥ| ataste bhāvābhāvo vāgvastumātram| pratiṣedhasāmarthātpratiṣeghyo bhāvo'stīti cet| nāsti| śaśaviṣāṇavacchabdo gaḍumātratvātpratiṣedhadvayārthānupapatteśca| kiñca, kāritramātranāśācca| viruddhapratyayasānnidhye kriyāmātraṃ hi no[de]ti, naśyati| tasmānnā[na]rthavān vināśaśabdaḥ| kutaśca ? āgamādupapatteśca|
uktaṃ hi bhagavatā-“utpannānāmakuśalānāṃ dharmāṇāṃ nirodhāya” iti| tathoktam-“ihaikatīyaḥ prāṇātipātiko bhavati” iti vistaraḥ| tathā-“tisraḥ saṃvartanyo'nalajalānilākhyā yābhiḥ krameṇa yāvacchubhakṛtsnā vinaśyante” iti| tathā-“jātipratyayaṃ jarāmaraṇam” iti|
upapattirapi| janmano'pyahetukatvaprasaṃgāt| yadi khalvasati sadbhāve'pyahetuko vināśaḥ, janmāpyahetukaṃ bhavatviti| tatsamarthahetusāmagrīsannidhāne janmadarśaṇā(nā)t, tatsahetukatvamiti cet| na| tadvināśe tulyatvāttasyāpi samarthahetusāmagryantarasannidhānābhyupagamāt|
vyākhyātāni lakṣaṇāni||
nāmakāyādayo vaktavyāḥ| na khalu vaktavyāḥ| na hi te śabdādanye vidyante, svabhāvakriyābhāvāditi| tadupadarśanārthamidamārabhyate|
[142] vākchabdādhīnajanmānaḥ svārthapratyāyanakriyāḥ|
saṃjñādyaparaṇā(nā)mānastrayo nāmādayaḥ smṛtāḥ||
viprayuktāḥ khalu nāmādayaḥ saṃskāraskandhasaṃgṛhītāḥ| vāk tu rūpaskandhasaṃgṛhītā vāggīrniruktirityarthaḥ| te ca tadadhīnotpattayo niruktyadhīnārthapravṛttayaśca jñānavadarthasya pratinidhisthānīyāḥ| nirukti[:]nāma saṃjñā| nārthāṇā(nā)mekasaṃjñatvāt| yathā tu cakṣurvijñānakāyādayaḥ pañcarūpādyāyattavṛttayaḥ, tadvatte'pi ‘vākchabdādhīnajanmānaḥ’ | ataścoktam-”vāṅ nāmni pravartate, nāmārthaṃ dyotayati |” iti| vācā saha kacaṭatapādayo jāyante tayā nidhīyanta iti| prativarṇānuvartinīnāṃ vācāṃ sāvayavatve'pi sati tadabhidhānānupapattiriti cet| na| śabdabhedasaṃcayasya pratyayatve tadabhidhānasāmarthyopapatteḥ|
kiñca, kriyayā ca tadastitvaṃ nirdhāryate| kā ca setyucyate| svārthapratyāyanaṃ kriyā| svaṃ svamarthaṃ pratyāyayatyapauruṣeyatvānnāmārthasaṃbandhasyaiṣa teṣāṃ kṛtāntaḥ|
te punarnāmasaṃjñādyaparanāmānaḥ|
tatra nāmaparyāyaḥ saṃjñākaraṇaṃ yathā ghaṭa iti|
padaparyāyo vākyam| yathā ghaṭo dṛśyata iti| yena kriyāguṇakālaviśeṣā gamyanta iti kvacit| “yāvadbhirarthavadbhiḥ padairvivakṣitārthaparipūrirbhavati tāvatāṃ samūhaḥ padam” ityābhidharmikāḥ|
vyañjanaparyāyo'kṣaraṃ yathā ka ityetadakṣaraṃ niravayavamamūrtamapratighaṃ rūpalakṣaṇavimuktaṃ traikālikārthapratyāyanasamarthaṃ manovada pratihatagamanamiti|
na, asiddhatvāt| na khalu vākchabdādanye nāmādayaḥ siddhyanti| vākchabda evārtheṣu saṃjñākartṛkṛtāvadhiḥ smṛtyā gṛhītāvayavasamudāyaḥ śroturarthaṃ pratyāya[ya]tīti kimanyairnāmādibhiḥ parikalpitaiḥ ? tatredaṃ pratyavasthīyate-
[143] anye nāmādayaḥ śabdādaprāptārthaprakāśanāt|
śabdo hiparamānu(ṇu)saṃcayaḥ| sa prāpyārthaṃ prakāśayet, pradīpavat| nājātadhvastasvargādideśasthānā(na)rtha(rthā)n prāptuṃ śaknoti| tasmātpratipadyasva [na] śabdo'rthaṃ pratyāyatīti| [i]taśca kramayaugapadyapratyāyanāsaṃbhavāt| katham ? balvajavat | iha hi bahūni balvajadravyāṇi pratyekamasamarthāṇi(ni) saṃbhūya rajvā(jjvā)tmanāvasthitāni dārvādyākarṣaṇakriyāsāmarthyopetāni bhavanti| na caivaṃ vākyātmānaḥ śabdāḥ buddhyupagṛhotāvayavasamudāyasaṃkṣepāḥ kramalabdhajanmānaḥ pratyekamarthaṃ(rtha)pratyāyanasamarthāḥ, ṇā(nā)pi saṃbhūya pratyāyayanti, saṃbhūyānavasthānād balvajavat| tasmātkramayaugapadyātpratyāyanā'saṃbhavānna śabdāḥ kañcidarthaṃ pratyāyayantīti siddham|
itaśca, pratyāyyapratyāyakādisaṃbandhānupapatteḥ| katham ? pradīpavat| tadyathā pradīpastamasi ghaṭādipratyāyyapratyāyakaśaktiyukto ghaṭadarśaṇā(nā)rthibhirupādīyate na ca kaścicchabdaḥ kasmiṃścidarthe kenacitsaṃbandhiviśeṣeṇa niyatavṛttiḥ, yastaṃ gṛhītvā pratyāyayemeti|
tatra tāvat| [na] pradīpasyai(sye)va pratyāyyapratyāyakasaṃbandho'sti| akṛtasaṃketasyāpratyāyanāt| nāpi saṃyogākhyaḥ saṃbandho'sti sadasatostadanupapatteḥ| guṇatvācceti kasmiścinna samavāyākhyaḥ| ata evākāśaguṇatvācceti kaścit| tasmātpratyāyyapratyāyanādisaṃbandhānupapatteḥ yadagadiṣma na śabdo'rthaṃ pratyāya[ya]tīti tatsamyagabhyadhāmeti |
sāmayikaḥ śabdo'rthapratyāyanaliṅgamiti cet| na| sādhyatvādvitarkavicārādhīnajanmanaḥ śabdasya kramayaugapadyapratyāyanānupapatteśca| prativarṇaviṣayā smṛtiḥ pratyāyayatīti cet| na| tatsamānadoṣatvātpūrvapakṣotsargatvācca| saṃskāra iti cet| na| asiddhatvāduktottaratvāca(cca)| yādṛcchikasaṃvṛttiśabdamātrābhyupagame vakṣyamāna(ṇa)doṣaprasaṃgācceti|
kiṃ punarete nāmakāyādayo nityā āhosvidanityā iti ?
anityāste tu vijñeyāḥ
tu śabdo[']nityatvavādaviśeṣa| rtho hetuḥ| ka iti cet| so'yamucyate-
sāpekṣārthavibhāvanāt||
katham ? jñānavat| tadyathā jñānaṃ cakṣurādīn hetūnapekṣyārthaṃ vibhāvayati tadvannāmādayo'pi ghoṣādīn hetūnapekṣyārthaṃ pratyāyayanti| tasmātsāpekṣapratyāyanādanityā iti||
yadi tarhi nāmādayo'rthaṃ pratyāyayanti, tatkathamidaṃ sadbhirapyucyate-‘śabdo'rthaṃ pratyāyayati’ iti ? tadatrābhidhīyate-
[144] svarūpaṃ vedayaṃścchabdo vyañjanādīni ca dhruvam|
arthapratyāyakaḥ prājñarbhaktikalpanayocyate||
āñjasā hi vāṅ nāmni pravartate nāmābhilapatotyarthaḥ| nāma tvarthaṃ dyotayatīti prativarṇānuvartino vāk khalu nāmābhilapanto svañca rūpamudbhāvayantī santānena pravartamānā guṇakalpanayā'rthaṃ pratyāyayatītyapadiśyate| na tvarthaḥ śabdavācyo dyotyo vā|
itaśca na śabdo'rthaṃ pratyāyayati| yasmāt-
[145] paramānu(ṇu)svabhāvatvād ghoṣaikatvaṃ na yujyate|
“edaitau kaṇṭhatālavyau” iti pratijñāyate| na caikasyāna(ṇu)vacanasya viśliṣṭasthānadvaye vṛttirupapadyate| paramāṇusaṃghātasya tūpapadyate| paramāna(ṇa)vo'pi pratyekaṃ[na]pratyāyayanti, digbhāgāstitvanāstitve tadabhāvācceti| samudāyo'pi madhyasthairapratyāyanānumānādantadvayenāpi na pratyāyayatītyadhyavasīyate| na cārthāntaraṃ samudāyibhyaḥ samudāyo'sti| sa kathamarthaṃ pratyāyayiṣyatīti| atītavarṇasamudāyastvantyavarṇāpekṣo manobuddhyopagṛhītasvarūpaḥ saṃbandhinyarthe buddhimutpādayan pratyāyayatīti yuktarūpo vyapadeśaḥ|
atra mīmāṃsā(saka) vaiyyākaraṇau pratyācakṣa(kṣā)te| nāsiddhatvāt| na khalu śabdasya paramānu(ṇu)mayatvaṃ siddham| tasmādanuttarametat| tau pratyabhidhīyate|
tādātmyaṃ pratighātitvāt
pratihanyate khalu śabdaḥ prākārabhittyādiṣu tasmātpratighātī śabda iti| na| asiddhā(ddham)| siddhasādhanādasiddheḥ| yatkhalu bhavatā pratighātitvenāprasiddhaṃ paramānu(ṇu)mayatvaṃ sādhyata ityasadetat| tatredaṃ pratyavasthīyate|
tatsiddhirvaraṇādibhiḥ||
ālāṅgalagrāhebhyaḥ siddhametadgarbhagṛhāntargatena pihite kavāṭe'bhihanyamānāḥ paṭahāḥ dhmāpyamānāśca śaṃkhā na śrūyante| hūṇanāḍonirghoṣeṇa ca nagaraprākārāṇi pātyante| tasmātsiddhena jālmaja(je)nāsiddhasya sādhanamidamāviṣkriyate nāsiddheneti|
yadapyucyate sphoṭaḥ śabdo dhvaniḥ śabdaguṇa iti tatrāpadiśyate-
[146] sphoṭākhyo nāparo ghoṣācchabdo nityaḥ prasiddhyati|
tasmāddhdhaniḥ śabdaḥ sphoṭa ityanarthāntaram| yathā hastaḥ karaḥ pāṇiriti lokaprasiddhametat| tasmāt-
kramavṛtterṇa(rna) śabdena kaścidartho'bhidhīyate||
iti prāgāviṣkṛtametat| tanmā pramoṣīḥ||
yadapyucyate vaiyākaraṇaiḥ śabdo buddhinirgrāhya eṣa vaiśeṣikairapi śrotragrāhyaḥ, śabdaścā(syā)nyatve'pi ca śabdatvādayaḥ śrotreṇa gṛhyanta iti| tayoridamucyate-
[147] na śrutyā śrūyate śabdastadanyā ca gatiḥ śruteḥ|
yo brūyātsa svamātmānaṃ vidvadbhirapahāsayet||
iti| tasmātpratītapadārthako loke dhvaniḥ śabdaḥ| tataścānye nāmādayaḥ sarvārthaviṣayā iti sthāpanā|
[148] pratidyotyaṃ yathāyogaṃ niyatāniyatāśca te|
tatra ya āryayā niruktyā nirucyante dvādaśāyatanaviṣayāste niyatābhidheyaṃ(yasaṃ)bandhāḥ, laukikyāśca kecinniyatābhidheyā nirucyante| ubhaye'pyete kṛtasaṃketasyārthaṃ pratyāyayanti| ye tu yathecchaṃ pitrādibhiḥ kriyante nāmakāyādibhiste hyaniyatā yadṛcchikā ityucyante| tadyathā ḍitthaḍavitthādayaḥ|
prathamāstu buddhotpāda eva pravartante nānyadeti| uktaṃ hi bhagavatā-“tathāgatānāmutpādānnāmapadavyañjanakāyānāmutpādo bhavati” ityetasmāt-
niyatodbhāvanād buddhaḥ sarvajña iti gamyate||
ye hyapaurūṣeyā dhātvāyatanaskandhādyavadyotakāste prathamaṃ buddhaviṣayā eva| tadavabodhācca bhagavānsarvajña ityabhidhīyate| te puṇa(na)rete-
[149] sattvākhyāḥ kāmarūpāptā niṣyandā'vyākṛtāstathā|
sattvākhyā hyete| yaśca dyotayati sa taiḥ samanvāgataḥ| na yo dyotyate| kāmāpta[aḥ] rūpāptāścaite vākchabdādhīnajanmatvāt| naiṣyandikā anivṛtāvyākṛtāścaiva|
yathā caite nāmādayaḥ
tathaiva ca vipākaśca sābhāgyaṃ[prāptayo dvidhā]|
[abhidharmadīpe vibhāṣāprabhāyāṃ vṛttau dvitīyasyādhyāyasya tṛtīyaḥ pādaḥ||]
[dvitīyo'dhyāyaḥ samāptaḥ||]